Бірлігі жарасқан көше
Ұлыстың ұлы күнін кенттегі Ағайынды Бозжановтар атындағы көше тұрғындары сән-салтанатпен атап өтті. Дәстүрге айналған мерекені ұйымдастырушылар сол маңайдағы Б.Жақып, Ә.Найзабаев көшесінің тұрғындарының басын қосты. Таңертеңнен бастап келіндер қазан көтеріп, наурыз көже пісірді. Үлкенді-кішінің барлығы дастархан басына жиналып, ақсақалдар бата берді.Ұлттық киім киіп, ақ жаулық таққан әжелер ауылдың алты ауызын айтып, сый-сияпатқа кенелді. Мерекелік дастархан басында арнайы дайындалған «Әнші әже», «Биші әже», «Аспаз әже» номинациялары табысталды. Салт-дәстүрмен бесікке салар, тұсау кесу рәсімдері жасалды.
– Жыл басы Наурызды жақсы көңіл күймен қарсы алуды дәстүрге айналдырғанымызға бірнеше жыл болды. Жаңа аймаққа қоныс аударған көршілер жақын маңдағы көше тұрғындарын қонаққа шақырды. «Өткен жылға өкпеміз жоқ, келер жылдан үміт көп» дегендей, келіп жеткен Наурыз – жыл басы әрбір отбасына қуанышымен, мол табысымен, береке-бірлігімен келсін. Көше тұрғындарының татулығы ұзағынан болсын. Жыл сайын аман-есен басымыз бір дастархан басында қосыла берсін, – дейді көше тұрғыны, білім саласының ардагері Сұлупан Шамшадинова.
Бибісара ЖАНӘЛІ
