Үй өртке оранды
Апта ағымында республикаға белгілі қолөнер шебері, ісмер Роза Әлбатырованың шаңырағында жайсыз оқиға орын алды. Айдарлы ауылына қарасты Қаныш Сәтпаев көшесінің №23 тұрғын үйі отқа оранып, қызыл жалынның астында қалды.Негізінен, оқиға 6 ақпан күні кешкі сағат 21.00 шамасында орын алған. Өрттің шығу салдары әзірге белгісіз. Заматында үйде болмаған отбасы мүшелері қызыл жалынды сөндіруге барын салған. Дегенмен, 7 бөлмелі үй жарамсыз күйге айналған. Бұл ретте, қытымыр қыста орасан шығынға ұшыраған отбасы мүшелеріне қайырымды жандар қол ұшын созуда. Айта кетейік, үйдегі дүние-мүлік пен ересек адамдардың төлқұжаты жанып кеткен. Тек балалардың құжатын алып шығуға мүмкіндік болған.
– Бүтіндей бір отбасының аязды күні үйі өртке оранып, қиындыққа тап болғаны жанға батады. Берекесі тасыған, айрандай ұйыған шаңырақтың ауыртпалығын сезгенде ел болып ұйымшылдық танытқан абзал. Алла Тағала қиындық бергенімен, одан шығар жолды көрсетеді. Біз – қашанда ағайын мен бауырға, жақынға қарайласқан, болысқан ата-баба ұрпағымыз. Бұл ретте, ел азаматтары мен жанашыр халықты, қаумалаған көпшілікті жалғыз үйінен айырылған отбасына көмектесуін сұраймын, – дейді Анар Қалдыбаева.
Халық даналығында«Қоғам бар жердің бәрінде ынтымақтасу болатындықтан, қайырымдылықта та болады» деген сөз бар. Жалпы, тілеулес, жанашыр ағайынның отбасы мүшелеріне қолғабыс ететініне сенеміз.
Балтабай ОРДАБЕКОВ
