Көп түкірсе – көл
Ауданға қарасты Шаған ауылында төтенше жағдай орын алып, елді мекендегі бір үй отқа оранды. Н.Сапаровтың үйін жалын шарпып, баспана толықтай жанып кеткен. Тілсіз жаудың салдарынан киім-кешек, дүние-мүлік толық жанып, құжат, телефондары да қоса кеткен.Үлкен ауылдағы төтенше жағдай бір отбасыны баспанасыз қалдырды. Көктем келсе де салқынның ызғары әлі бар. Сондықтан қазір баспананы бірден салып алу бұл отбасыға оңай соқпайды. Үй иесі шарушылықта егінші болып жұмыс атқарса, әйелі жұмыссыз. Олардың үш баласы бар.
Әп-сәтте абдырап үйі өртенген отбасыға көмек қолын созуымыз қажет-ақ. «Көп түкірсе – көл» деген. Қайырымды, жомарт жандар жабырқаған жандардың жанынан табылып, көмек көрсетсе игі. Қазірдің өзінде ауыл адамдары «бір жағадан бас, бір жеңнен қол» шығарып, көмек көрсетуде. Ауылдағы «Шаған Жер» ЖШС тарапынан да айтарлықтай көмектер жасалып жатыр.
Жылы үйдің өртке орануы кімге болса да оңай тимесі анық. Сондықтан көп болып көмек қолын созсақ, елдігімізді білдіреміз.
Е.ЖАППАРБЕК
