Туған жер сен дегенде жырым асқақ,
Күн артынан күлімдеп күн ұласпақ.
Тәуелсіздік тұғырын биіктету,
Алдымызға қойылған ұлы мақсат!Дария арнасында тасып ағар,
Думанына елімнің қосылам әр.
Жерге тамған күннің әр сәулесінде,
Таусылмайтын ырзықты несібе бар.Қалдырар кеуделерге мың ұшқын із,
Кең аламыз еңбекте тынысты біз.
Бабалардай жанымызды бермесек те,
Барымызды беруге тиістіміз!Себелеп нұрын төксе жаныма арай,
Гүлденіп сала берер бағым оңай.
«Әр қазақты менің бір жалғызым» деп,
Бекерге жырламаған Сабыр Адай!Өнердің әспеттесем сазын бөлек,
Жалт ойнайды жастардың көзінде бек.
Қорқыттан бастау алған қоңыр күйдің,
Құдіретін әрине сезу керек!Естісек келешектен ғажап үн мың,
Айтары айшықталар ғазалымның.
Көк тудағы қырандай қалықтаған,
Арын арлап жүрейік қазағымның. Жақсының сөзін естіп жөн ұғасың,
Тегіңді танымасаң арыңа сын.
Тарихтың қатпарларын түртіп қалсаң,
Сан асыл дүниеге жолығасың!Ашылар талай шындық кеңесте кең,
Кереметтей ертеңім елестетем.
Өткенімді өлеңмен өрнектесем - ,
Рухани сабақтастық емес пе екен?!Һәм бастап елдің көшін дүр ағалар,
Ұрпағын тәрбиелеп жүр аналар.
Шапағатқа халқымды бөлеп кеткен,
Діннің жаққан шырағын ғұламалар!Би билеп аруларым мың бір керім,
Жайлап жүр жалын жастар жырдың төрін.
Бәйгеде шашасына шаң жұқтырмай,
Топтан озып келуде дүлділдерім!Жайқалып ақ күріш пен бауларым бір,
Атады арайланып таңдарым кіл.
Тұғырлы тұлғаларын ұлықтаған,
Өзіндік дәстүрге бай ауданым бұл!Жаңылмай тіршілігі ырғағынан,
Ырыс пен берекеге тұнған ұям.
Жасампаз тірліктердің жаршысы боп,
Жасанып, жайнай берші Сырдариям!