Аудандық полиция бөлімінің Қоғамдық қауіпсіздік бөлімшесі тарапынан отбасындағы зорлық-зомбылықтың алдын алуға байланыс­ты бірқатар жұмыстар атқарылуда. Жалпы алғанда, сала мамандары ауданға қарасты білім ошақтарында ата-аналармен кездесулер өткізіп, сан түрлі іс-шараларды жүзеге асыруда.

– Кездесудің негізгі мақсаты – отбасы институтын нығайту, тұрмыстық зорлық-зомбылықтың алдын алу, қоғамда құқықтық мәдениетті қалып­тастыру және зорлық-зомбылықсыз орта құру. Сонымен қатар ата-аналар мен жасөспірімдер арасында құқықтық сауаттылықты арттыруға басымдық берілуде. Отбасындағы зорлық-зомбылықтың алдын алу – қоғам үшін аса маңызды мәселелердің бірі. Себебі отбасы – тәрбиенің бастауы, ал отбасындағы тыныштық пен сыйластық қоғамның тұрақтылығына тікелей әсер етеді. Қазіргі таңда құқық қорғау органдары тарапынан тұрмыстық зорлық-зомбылықтың алдын алу бағытында жүйелі жұмыстар жүргізілуде. Әсіресе ата-аналар балалардың қауіпсіздігіне, тәрбиесіне және олардың бос уақытын тиімді ұйымдастыруға ерекше мән беруі қажет. Бірлескен профилактикалық жұмыстар арқылы ғана біз зорлық-зомбылықсыз қоғам қалыптастыра аламыз, – деді аудандық полиция бөлімінің Қоғамдық қауіпсіздік бөлімшесінің инспекторы, полиция аға лейтенанты Айгүл Рсымова.

Іс-шара барысында ата-аналарға отбасындағы сыйластық пен түсініс­тіктің маңыздылығы айтылып, бала тәрбиесіндегі ата-ананың жауап­кер­­шілігі ерекше екені атап өтілді. Құқық қорғау саласының мамандары қоғамдағы зорлық-зомбылықтың алдын алу – баршаға ортақ міндет екенін жеткізді.

Сырдария аудандық полиция бө­лімінің профилактикалық есебіне ерекше талап санатымен 15, қорғау нұсқамасы санатымен 35 азамат енгізілген.