Ол кісі теміржолға қара жұмысшы болып келді. Қолында балға, иығында күрек. Аптап ыстықта рельс төседі. Ақшұнақ аязда жолды қардан тазалады. Мереке, демалыс дегенді білмеді. Өйткені теміржолда демалыс болмайды. Поезд жүруі керек. Халық аман жетуі керек.

Қатардағы жұмысшыдан станция бастығына дейін абыройлы жолдан өтті. Бастық болдым деп кеңседе отырмады. Қиын жерге өзі бірінші барды. "Жігіттер, мен сендерден артық емеспін. Теміржол — бәрімізге ортақ" дейтін.

Теміржолдың мың заңы бар. Бірақ ең басты заңы біреу: Адам өмірі бәрінен қымбат.

Бір қыста жолаушылар поезы далада тұрып қалды. Іште 100-ден астам адам. Аяз 40 градус. Вагонның есігі қатып қалған. Сол кезде Болатбек ата бригадасын бастап барып, балтамен шауып, есікті қолмен ашып. Адамдарды аяздан аман алып қалыпты.

Тағы бірде жүк поезы боранда 5 шақырым жерде тұрып қалды. Байланыс жоқ. Түн. Ол кісі жаяу барып, қолмен қар күреп, жолды ашты. "Елдің несібесі жолда қатып қалмауы керек. Темір тоқтаса, нан тоқтайды" депті.

42 жыл — бір адамның ғұмыры. Болатбек ата осы ғұмырын түгелдей теміржолға берді. Оның арқасында Тереңөзек станциясы тәртіптің, тазалықтың, қауіпсіздіктің үлгісіне айналды.

Қазір ол кісі — абыройлы еңбек ардагері. Бірақ теміржолдан қол үзген жоқ. Жастарға ақылшы. "Рельстің үстінде жүріп, аспанға қарауға болмайды. Әрдайым алдыңа қара. Өйткені сенің артыңда халық тұр" деп үйретеді.

Әке жолын жалғаған ұлдар Болатбек атаның үлкен ұлы — Мәліков Бақытбек те әке жолын қуып, бүгінде теміржол саласында абыройлы еңбек етуде. Әкеден көргенін іске асырып, саланың ыстығына күйіп, суығына тоңып жүр.

Ал әулеттің теміржолдағы туын бүгін Тереңөзек станция бастығы Мәліков Мұрат биік ұстап келеді. Ол кісі үшін теміржол — жай жұмыс емес. Бұл — әкеден қалған аманат, ардагер әкенің алдындағы перзенттік парыз. 19 жылдан бері бір салада табан аудармай, антына адал қызмет етіп келеді.

Әкеден өнеге алған ұлдары да бүгінде теміржолда. Сол кісідей станцияны басқарып, әке аманатын орындап жүр.

Елге тарту: Жаңа вокзал мен болашақ көпір

Мұрат Болатбекұлының және аудан әкімінің тікелей бастамасымен қажырлы еңбегінің арқасында Тереңөзекте жаңа, заман талабына сай вокзал құрылысы басталды. Қазір жұмыстар қызу жүріп жатыр. Аз уақыттан соң қызыл лентасы қиылып, халық игілігіне беріледі.

"Вокзал — ауылдың айнасы. Келген қонақ бірінші соны көреді. Әкем үнемі солай айтатын" дейді. Демек, бұл жаңа вокзал — әке өсиетінің орындалғаны.

Таудан биік, теңізден терең әкем,

Еңбегіңіз еленген ерен әкем.

Адамзаттың асылы әз Пайғамбар,

Одан кейін тұрады менің әкем.

Судан таза, қардан да аппақ арың,

Ешкімнің ала жібін атамадың.

Менің әкем 1000 жылда бір туады деп,

Ұлы адам деп ұлыма мақтанамын.

Кешегі мен әкемнің бүгінімін,

Кекілі желтараған құлынымын.

Болатбек деген мен емес, менің әкем,

Мен Болатбектің жай ғана сынығымын.

Теміржол — темірден ғана жасалмайды. Теміржол — адамның темірдей тәртібінен, таудай төзімінен, адал еңбегінен жасалады.

Болатбек ата 42 жыл бойы осы шындықты дәлелдеп келеді. Ол кісі төсеген рельспен бүгінде мыңдаған тағдыр өтіп жатыр. Абыройлы әулеттің алар асуы әлі алда

Болатбек Нағмедуллаұлы бастаған даңқты жолды бүгін ұлдары Бақытбек пен Мұрат абыроймен жалғап келеді. Бірі — өз ісіне адал жан, бірі — бүгінгі күннің басшысы. Бірақ мақсаттары бір: халыққа адал қызмет ету. Елдің алғысынан асқан марапат жоқ.

Бұл 42 жыл - тек жұмыс өтілі емес. Бұл - халыққа берілген ант. Бұл бір әулеттің теміржолға жазған тағдыры. Ақсақалдың төккен тері, басқан ізі айтқан ақылы - келешек ұрпаққа қалған ең үлкен мұра.

Теміржолдың күміс қанаты талмасын. Оның ақсақалының абыройы асқақтай берсін.