Тәртіп бар жерде қауіп жоқ
Темірден төнер қауіп бар. Темір тұлпар алыс жерді жақын етеді, айта берсек, пайдасы ұшан-теңіз. Десек те зиянды жағы да жеткілікті. Жүргізуші тәртіпке бағынбаған жағдайда өмірімен жауап беруі мүмкін. Алматы қаласындағы жантүршігерлік жол апаты – бүгінгі күннің басты тақырыбына айналып отыр. Бұл туралы тиісті органдар өз жұмысын атқарып, қоғам белсенділері пікір білдіруде.Негізінен, көлік жүргізу – өзің үшін ғана емес, өзгелер өмірі үшін жауапкершілік. Дәл осы жауапкершілікті кез келген жүргізуші рөлге отырған сәтте айқын сезінуі тиіс. Ешкім «қазір жол апатына ұшыраймыз» деген оймен жолға шықпайды. Тағдырдың жазуынан ешкім аспаған, десе де қауіпсіздіктің басты талап екенін естен шығармау керек.
Жол апаттары әдетте жүргізушінің бейқамдығынан орын алып жатады. Бұның зардабы бір емес, бірнеше көлікке, адамға тиюі мүмкін. Кейде жастар жағы ерсіленіп, тас жолды жарыс алаңына айналдыратын тұстар да жиі кездеседі. Бұл – бірнеше адамның тағдырын тәуекел ету. Құқық қорғау қызметкерлерінің мәліметінше, қанша айтылып, ескертіліп жатқанымен масаң күйде көлік жүргізу, жол ережесін бұзушылар азаймай отыр.
– Сырдария аудандық сотында көлік басқару құқығынан айырылса да, заң талаптарын елемей, көлік тізгіндеген азаматқа қатысты Қазақстан Республикасының Әкімшілік құқық бұзушылық туралы Кодексінің 608-бабы 6-бөлігі бойынша М-ға қатысты әкімшілік құқық бұзушылық туралы іс қаралды. Азамат М көлік жүргізу құқығы жоқ бола тұра, автокөлігін алкогольдік ішімдік ішкен масаң күйінде тізгіндеген.
Медициналық куәландырудың қорытындысына сәйкес, жүргізуші жеңіл дәрежелі алкогольді, масаң күйінде болған. Сот отырысында оның құқық бұзушылық әрекеті өзінің кінәсін мойындаған жауабымен, сондай-ақ сотта зерттелген іс құжаттарымен толық дәлелденген. Сот қаулысымен М жасаған құқық бұзушылығы үшін ҚР ӘҚБтК-нің 608-бабының 6-бөлігімен кінәлі деп танылып, оған 20 тәулікке әкімшілік қамаққа алу жазасы тағайындалған. Мас жүргізуші өз өміріне ғана қауіп төндіріп қоймайды, сонымен қатар айналасындағылардың да өміріне қауіп төндіреді. Сондықтан да ішімдік ішіп, көлік басқару орны толмас қайғыға себепші болатынын естен шығармайық, – дейді Сырдария аудандық сотының төрағасы Қ.Бержанов.
Сала мамандары бақылау, қадағалау, профилактикалық іс-шараларды тұрақты жүргізгенімен, барлық жағдайды толық бақылап отыру мүмкін емес. Мәселе ең алдымен адамның санасына байланысты. Көлік тізгінінде отырып, ұялы телефонмен сөйлесіп, ойды басқа жаққа бұру, қауіпсіздік белдігін камера үшін немесе жол полицейі үшін ғана тағу сияқты әрекеттер – негізгі себеп. Көлік жүргізуші әр сапарда кемінде он адамның тағдыры «өз қолында» екенін ұғынса, бәлкім, апатты жағдай азаяр ма еді?! Жолда жүру мәдениеті – өмір мәдениеті. Жол қателікті кешірмейтінін естен шығармаған абзал.
А.МҰХАНБЕТҚАЛИ
