Алдағы уақытта автокөлік жүргі­зу­шілеріне талап күшеймек. Яғни осы жылдың 12 наурызынан бастап, елімізде Әкімшілік құқық бұзушылық туралы кодекстің 31-бабына енгізілген өзгерістер күшіне енеді. Бұл туралы Қазақстан Ішкі істер министрлігі мәлімдеді. Заң аясында елімізде бейнекамера енді рөлде телефон қолдану мен белдік тақпау фактісін тіркейді. Бұл ретте автокөлікті басқарып келе жатып, телефон қолданып немесе қауіпсіздік белдігін тақпаған жағдайда автоматты түрде айыппұл арқалайсыз. Бұған дейін бейнекамералар 6 негіз­гі бұзушылықты анықтап келген еді. Жылдамдық, бағдаршам, жол белгі­лері, тоқтау және тұру, бір-бірінен озу ережелері, жаяу жүргіншіге жол бермеу секілді заң бұзушылықтар азаматтарды жауапкершіліктен босатпайды. Кейбір жеңіл құқық бұзушылықтар бойынша жүйе автоматты түрде ескер­ту де шығара алады. Бейнекамера жаяу жүргіншілерді емес, тек жүргізушілердің жол ережесін бұзуын ғана анықтайтынын айта кетейік.

Жол апатының алдын алудың ең тиімді жолы – тәртіп пен жауап­кершілік. Әр жүргізуші көлікке отыр­ғанда тек өз өмірін емес, өзгенің де тағдырына жауапты екенін ұмытпауы тиіс. Қауіпсіздік белдігін тағу, жыл­дамдықты шектеу, телефонға алаң­дамау – қарапайым, бірақ өмір сақ­тайтын қағидалар. Мемлекет тарапынан да жол сапасын арттыру, бейнебақылау жүйесін жетілдіру, заң талаптарын күшейту жұмыстары жалғасуда. Әсіресе цифрлық бақылау құралдары жүргізушілердің жауапкершілігін арттыруда тиімділік көрсетуде. Расында, адам өмірі – ең қымбат құндылық. Бір сәттік сал­ғырттықтың салдары орны толмас қайғыға айналуы мүмкін. Сондықтан жолда тәртіп сақтау – заң талабын орындау ғана емес, адамгершілік парыз. Жол қауіпсіздігі мәдениетін қалыптастыру арқылы ғана біз апат санын азайтып, бейбіт әрі қауіпсіз қоғам құра аламыз. Әрбір жүргізуші жол үстінде сақ болып, өз өмірі мен өзгелердің амандығына жауап­кершілікпен қараса, талай қайғылы жағдайдың алдын алар еді.

Бейнебақылау жүйелері бүгінде қоғамдық қауіпсіздікті қамтамасыз етудің маңызды құралына айналды. Әсіресе жол қауіпсіздігі, құқық­бұзушылықтың алдын алу және қоғамдық тәртіпті сақтау бағытында бейне­камералардың рөлі айрықша. Алайда олардың тиімділігі ең алдымен техникалық сапасына байланыс­ты. Қазіргі заманғы бейнебақылау жүйелері жасанды интеллект эле­менттерімен толықтырылуда. Олар адам­ның қозғалысын, көлік нөмірін, жылдамдықты автоматты түрде анық­тай алады. Мұндай мүмкіндіктер құқық қорғау органдарының жұмысын жеңілдетіп, жедел әрекет етуге жағдай жасайды. Қоғамдық тәртіп пен жол қауіпсіздігін қамтамасыз ету үшін заманауи стандарттарға сай бейне­бақылау жүйелерін енгізу – уақыт талабы.