Осыдан 35 жыл бұрын Нағи Ілиясов ауылында дүниеге келген Гүлсара Ғинаятқызы үстел теннисімен 10 жасынан бастап айналысады. Алғаш рет Көкшетау қаласында жүріп осы спорттың қыр-сырын меңгерген спортшы бүгін­де аудан намысын түрлі республикалық және халықаралық жарыстарда қорғап келеді. Қазіргі таңда ол бапкерлік қызметті де қатар алып жүр.

Бастапқыда шағын ғана доп пен ракетканы қолына алған жас спортшы болашақ мамандығын да осы спортпен байланыстыра білді. Көз ілеспес жылдамдықпен ойналатын бұл спорт түрімен айналысу – үздіксіз жаттығып, шеберлікті шыңдауды талап етеді. Ракетканы нық ұстап, доп­тың бағытын дәл табуға талпынған жас өрендерді жат­тық­тырып жүрген білікті маман соңғы он жыл бойы бапкерлік қызметпен айналысуда.

– Мен бұған дейін «Шет тілі» және «Ақпараттық жүйе­лер» маман­дықтары бойынша жоғары білім алып, диплом иегері атандым. Қашанда білім адамға артықтық етпейді. Үнемі ізденіс үстінде жүріп, спортшы болумен қатар тіл маманы ретінде де кәсіби біліктілігімді жетілдірдім. Кейіннен «Дене тәрбиесі және спорт» мамандығы бойынша үшінші дипломымды қолға алған кезде үстел теннисінен жаттықтырушы ретінде өз бағытымды нақты айқындадым. Бүгінде Сырдария ауданы бойынша 22 спортшыны үстел тен­нисінен спортшы дайындап келемін. Жарыстарға қатысып, түрлі қарсыластармен ойнау – шәкірттерім үшін үлкен тәжірибе. Әр ойыннан кейін өз қателіктерін саралап, келесі жолы жақсы нәтиже көрсетуге талпынады. Спорт маған тек күш пен ептілікті ғана емес, өз-өзіңе деген сенімді де сыйлады. Сондықтан спортшыларымның сенімді болуы үшін әр жарыс сайын оларды жігерлендіріп отырамын, – дейді Гүлсара Ғинаятқызы.

«№11 Сырдария ауданының олимпиадалық резервтің маман­дан­дырылған балалар-жасөс­пірім­дер мектебінің тәжірибелі жаттық­тыру­шысының шәкірттері бүгінде ҚР чемпионаттарында және «Ауыл спартакиадасында» қарсыластарымен шеберлік байқасып, жақсы нәтижелерге қол жеткізуде.