Көпсатылы іріктеуден өткен жұмыстар өзекті­лі­гі­мен, ғылыми негіз­ділігімен және практикалық маңыз­дылығымен ерекшеленді. Ғылыми жобаларды қорғау Regeneron ISEF халықаралық стандартына сай ашық көрме форматында ұйымдастырылды. Қазылар алқа­сының шешімімен 281 жеңімпаз бен жүлдегер анықталып, Қазақстан Республикасы Оқу-ағарту министр­лігінің I, II және III дәрежелі дипломдарымен, сондай-ақ алтын, күміс және қола медальдарымен марапатталды.

Жүлдегерлер қатарында сыр­дариялық өрен, №35 Иса Тоқтыбаев атындағы мектеп-лицейдің 9-сынып оқушысы Ұлдана Тәліпова бар. Жас ізденуші облыста бірінші орын алған жалғыз жеңімпаз. Мұнан бөлек, облыс бойынша қатысқан оқушылардың арасында екі екінші орын, алты үшінші орын және бес оқушы «Алғыс хатпен» марапатталды.

Жеңімпаздарды салтанатты марапаттау рәсіміне Қазақстан Респуб­ликасының Оқу-ағарту министрлігі өкілдері және Ұлттық биотехнология орталығы мен жетекші жоғары оқу орындарының ғалымдары қатысты.

ҚР Оқу-ағарту министрлігі Орта білім беру комитетінің төрағасы Қаныбек Жұмашев жас зерт­теушілердің жетістіктері елдің зияткерлік әлеуетінің айқын көрсеткіші екенін атап өтті.

– Бүгін біз ғылымға алғашқы қадам жасаған, өз ізденісімен және табан­дылығымен дараланған жас дарындардың еңбегін бағалап отырмыз. Бұл жобалардың әрқайсысында үлкен еңбек, жүйелі зерттеу және нақты нәтижеге ұм­тылыс бар. Осындай бастамалар отандық ғылымның дамуына серпін беріп, еліміздің ғылыми қауымдастығын жаңа буынмен толық­тыратынына сеніміміз мол, – деді төраға.

Республикалық кезеңнің жеңімпазы Ұлдана Тәліпова химия секция бойынша «Жергілікті жер арамшөптерін химиялық модификациялау арқылы алынған биоад­сор­бенттің тиімділігін анықтау» тақы­рыбындағы ғылыми жобасын сәтті қорғады. Жетекшісі – мектеп-лицей мұғалімі Әсел Көшербаева.

– Бұл жетістік – сапалы білім мен жүйелі еңбектің, ғылыми ізденістің және шығармашылық табандылықтың айқын көрінісі. Табанды еңбектің, үздіксіз ізденістің және ғылымға деген шынайы қызығушылықтың нәтижесі. Жергілікті табиғи шикізатты ғылыми тұрғыда зерттеп, оның практикалық маңызын дәлелдеу біз үшін үлкен тәжірибе болды. Осы жеңіске жету жолында ғылыми бағыт-бағдар беріп, терең теориялық қолдау көрсеткені үшін Қорқыт ата атындағы ҚУ-дың «Биология, география және химия» БББ аға оқытушысы, химия ғылымдарының кандидаты Гүлжан Балықбаеваға алғысымды білдіремін, – деді білікті ұстаз Әсел Көшербаева.

Іс-шарадан керемет әсермен орал­ған жас ғалымның еңбегі барша сыр­дариялық ұстаздар қауымына ерекше серпін беріп, дарынды оқушылардың білім мен ғылымға деген ынтасын арттыра түсті.

– Үздіксіз ізденіс пен табанды еңбектің арқасында жеңімпаз бол­ғаныма қуаныштымын. Жетек­ші ұстаздарымның ғылы­­ми жоба әзірлеудегі қол­дауына алғысым шексіз. Астана қаласында өткен ауқымды іс-шарадан өзім секіл­ді қаншама достар таптым. Білім мен ғылымның бағындыратын белесі өте биік. Сондықтан дарынды оқушыларға сәттілік тілей­мін, – дейді жас дарын Ұлдана Тәліпова.

Айту керек, ауқымды іс-шараны ҚР Оқу-ағарту министрлігінің қол­дауы­мен «Дарын» рес­пуб­ликалық ғылыми-прак­тикалық орталығы, Астана қаласының білім басқармасы және «Астана дарыны» дарынды балалар мен талантты жастарды анықтау және қолдау орталығы ұйымдастырды.