Еркіндік пен табыс жылы –жылқы

Есігімізден шығып бара жатқан жылан жылында жетістікке толы күндер көп болды десек, артық айтқандық емес. Ең алдымен, Мемлекет басшысы Қасым-Жомарт Тоқаев бірнеше мәрте шетелге сапарлап, өзге ел басшыларымен кездесу өткізді. Мемлекеттік, ресми және бейресми өткізілген әрбір жиында еліміз үшін маңызды құжаттарға қол қойылды. Инвестиция тарту, ел экономикасын тұрақтандыру, ішкі және сыртқы саясатты жүргізу барысында ауқымды жұмыс атқарылды. Елімізге де мәртебелі қонақтар келіп, Қазақстанмен әріптестік байланыс орнатуға ниетті екенін аңғартты. Ал жаңа жылдан жақсылық күтетініміз анық.

Қазақта жылқы жылын жұтсыз, бере­келі жылға санайды. Мал өсіп-өнетін, та­быс молаятын сәтті жыл деп күтеді. 2025 жылды Сыр өңірі табысты қорытындылап отыр. Облыс көлемінде әлеуметтік нысандар ашылып, «көгілдір отынға» қосылған ел­ді мекен қатары көбейді. Қомақты ин­­вес­­тиция тартылып, бас шаһар мен 7 ауданның әлеуеті арта түсті. Биыл Қызылордада жаңа стадион салынып, ха­лық игілігіне берілді. Халықаралық, рес­пуб­ликалық деңгейде бірқатар келелі жиын өтіп, өңіріміз ойлы көзқарас пен пі­кір­талас алаңына айналды. Алдағы уақыт­та қолға алынған барлық жоба сәтімен жүзеге аса бермек.

Сырдария ауданы да жағымды жаңа­лығымен жұртшылықты қуантуда. Ел­ді мекендердегі көшелер жөнделіп, ден­сау­лық сақтау саласының мекемелері жаң­ғыртудан өтті. «Көгілдір отынның» игілігін көрген сырдариялықтардың қатары өсті. Ауданда жаңа вокзалдың құрылысы бас­талды. Дарынды жастар білімде, талантты өнерпаз легі өнерде, жігері мықты спортшылар байрақты бәсекеде топ жарды, аудан мерейін тасытты. Үздіктер санатына кіретін әрбір аудан халқының қоғам­дағы орны ерекше.

Ауыл шаруашылығы саласында да алға жылжу бар. Биыл шаруа біткен су тап­шылығына қарамастан межелі өнім­ді жинады. Сыр салысын жинауда табан­дылық көрсетті. Жалпы алғанда, аудан өмірінде тұрақтылық пен бірлік берік сақ­талып, ескі жылды тек жақсылықпен шығарып салып отыр.

Жалпы елімізде бұған дейін жылқы жылында біршама елеулі оқиға орын алған. Осыдан 35 жыл бұрын Қазақстан­ның мемлекеттік егемендігі туралы Дек­ларация тәуелсіздікке бастар жолдың ал­ғашқы әрі батыл қадамына айналғанын айта кетейік. 2002 жылы Түркістан қала­сында өткен Дүниежүзі қазақтарының екінші құрылтайы ұлт бірлігі мен рухани тұтастықты нығайтқан маңызды тарихи оқиға санатына кірді. 2014 жылы Мемлекет басшысы елімізді «Қазақ Елі» деп атауды ресми түрде ұсынған болатын. Ал нумерологтар жылқы жылында адамдар тәуекелге барып, тез шешім қабылдайтынын алға тартып отыр. Мамандардың айтуынша, алдағы жыл ғалымдар мен спортшылар үшін табысты болмақ. IT саласында тың жаңалықтар орын алады. 2026 жылдың екінші жартысында жастар үшін отбасын құру қолайлы уақыт. Білім алуға инвестиция құйған жұрт­­шылық табысты болмақ.

Айта кетейік, зейнетақы мен жәрдем­ақы көтеріліп, әлеуметтік жағдайға көңіл бөлінеді. Өз кезегінде елімізде 2026 жы­лы бірнеше ұлт зиялысы мен ақын-жазу­шының мерейтойы атап өтіледі. Ең басты құндылық – еліміздің тәуелсіздік алғанына 35 жыл толады.

Балтабай ОРДАБЕКОВ

Фото: ашық дереккөз