Жиынды ашқан ауыл әкімі Қанат Несіпбаев жиналған жұртшылықты Жаңа жыл мерекесімен құттықтап, жылы лебізін білдірді.

– Өтіп бара жатқан жыл ауылымыз үшін берекелі де мазмұнды болды. Бірлесе атқарған еңбектің арқасында елді мекеннің әлеуметтік жағдайы жақсарып, бірқатар маңызды жұмыс жүзеге асты. Ауылдың көр­кеюі мен тұрғындардың тұрмыс сапасын арттыру жолында сіздердің қол­дауларыңыз бен бірліктеріңіз үлкен рөл атқарды. Жаңа жыл – жаңа үміт пен жарқын бастамалардың кезеңі. Алдағы уақытта да ауылымыздың дамуы жолында бірлесе еңбек етіп, берекелі істерді жалғастыра береміз деп сенемін. Шаған ауылында алдағы уақытта бірнеше жобаны жүзеге асыруды жоспарлап отырмыз. Баршаңызды мерекемен шын жүректен құттықтай отырып, отбасыларыңызға амандық пен табыс тілеймін, – деді ауыл әкімі.

Өз кезегінде жыл бойы табанды еңбек еткен бірнеше адам ауыл әкімінің марапатына ие болды. «Жұ­мысшы мамандықтар» жылы аясында ауыл тазалығына жауапты болып, адал қызмет атқарған жандарға құр­мет көрсетілді. Үздіктер қатарында сан салада еңбек етіп, ерік-жігері мен кәсіби біліктілігін танытқан бір­қатар маман болды. Кәсіпкерлік, мәдениет, денсаулық сақтау, ауыл шаруа­шылығы, білім беру секілді әрбір сала­да еңбек етіп жүрген азаматтардың мерейі өсіп, мәртебесі биіктеді.

Жылқы жылынан зор үміт күтетін жерлестерін ауылдық ардагерлер ке­ңесінің төрағасы Абдулла Атақаев та құттықтады. Ал жыл қорытындысы бойынша «Үздік мекеме» номинация­сын жеңіп алған ауылдық мәдениет үйінің өнерпаздары әсем ән мен күйден шашу шашты.