Салтанаты іс-шарада ауыл әкімі Нұғман Смайлов жиналған көпшілікті Жаңа жыл мерекесімен құттықтады.

– Ертеректен өріске малы жайылып, қырманы астыққа толған Шаған ауылының халқын Жаңа жыл мерекесімен құттықтаймын. Елді мекенде жыл көле­мінде бірқатар ауқымды жоба жүзеге асырылды. Электр желісі жаңартылып, өзге де жұмыстар назардан тыс қалмады. Келер жылдың басты жаңалығы елді мекенге «көгілдір отын» кіргізу жұмысы бас­талады. Сан салада қызмет ететін ауылдастарымыз жылды табысты қорытындылауда. Дәстүр бо­йынша «Жыл үздіктері» марапат төрінен көрінбек. Алдағы уақытта елді мекеннің инфрақұрылымдық, әлеуметтік жағдайын жақсарту мақсатында ауқымды жобаларға иек артамыз, – деді ауыл әкімі.

Ең алдымен, жыл бойына ауыл тазалығына белсене араласқан қызметкерлер марапат төрінен көрінді. Әрине, еңбек адамына лайықты құрмет көрсету – заңдылық. Күнделікті ауыл тазалығына бей-жай қарамай, қажыр-қайратын көрсеткен олардың еңбегі ерекше. Аптап ыстықта, қаһары қатты аязда ауылды күл-қоқыстан арылту оңай шаруа емес. Бұдан кейін «Жыл үздігі – 2024» кешінің басты кейіпкерлеріне құрмет көрсетілді.

Айта кетейік, «Үздік мемлекеттік қызметкер» аталы­мына ауыл әкімшілігінің жетекші маманы Гүлсім Асқарова, «Үздік мұғалім» номинациясына №37 мектеп-лицейдің ұстазы Татьяна Казка, «Үздік қыз­мет­кер» номинациясына «Балбөбек» бөбекжай бала­бақ­шасының маманы Ботакөз Жаңабаева мен байланыс және ақпараттандыру бөлімшесінің қызмет­кері Ғани Әбдікәрімов, «Үздік шаруашылық меңгерушісі» номи­нациясына №14 «Алтын сақа – Шаған» балабақшасының маманы Бахытжан Өтетілеуов ие болды. Ал «Үздік жаттықтырушы» номинациясын №12 балалар-жасөспірімдер спорт мектебінің мұғалімі Рамазан Мейрамбеков, «Үздік мейірбике» номинациясын ауылдық амбулаторияның медбикесі Бақыткүл Қожахметова, «Үздік тәрбиеші көмекшісі» номинациясын «Нұр-Ай Сая» балабақ­шасының маманы Жұмагүл Досмағанбетова енші­леді. Сонымен қатар «Үздік мекеме – 2024» мәртебесіне №37 мектеп-лицей ұжымы қол жеткізді. Салтанатты іс-шарада ауыл өнерпаздары өнер көрсетті.