Есірткісіз болашақ – жастардың келешегіне кепіл
Қоғамды алаңдатқан өзекті мәселенің бірі – нашақорлық екені мәлім. Оның зияндылығын алдын алу мақсатында аудан бойынша бірнеше кешенді іс-шара жоспарға қойылған.Өз кезегінде «Руханият орталығында» аудандық мәдениет және тілдерді дамыту бөлімінің ұйымдастыруымен жүзеге асқан «Есірткісіз болашақ» тақырыбындағы байқаудың қорытындысы шығарылды. Оған Сырдария аудандық прокуратурасының прокуроры Арман Жұмашев, аудан әкімі аппаратының мемлекеттік-құқықтық жұмыстар бөлімінің басшысы Ернар Зұлқарнаев, аудандық полиция бөлімінің инспекторы Айгүл Ырысымова, аудандық емхананың наркологы Қалдыбек Жұмабеков қатысты.
Негізінен аудандық байқауда елді мекендердің мәдениет ошақтары дайындаған бейнероликтер сараланды. Байқау барысында қатысушылар есірткінің зияндылығын, адам өміріне қауіптілігін барынша көрсете білген. Айрықша форматта жүзеге асқан іс-шарада құрметті меймандар сөз алып, қатысушыларға сәттілік тіледі.
– «Есірткісіз болашақ» акциясы аясында ұйымдастырылған іс-шара жастарды жаман әдеттен аулақ болуға шақыруға арналып отыр. Жалпы қоғам өмірінде есірткіге тәуелді болып, нашақорлықтың зардабын тартқан қаншама адам бар. Соларды өмірге қайта бейімдеу – маңызды. Біз осы жолда оқушы санасына есірткісіз болашақ жарқын екенін ұғындыруды көздейміз. Мұндай іс-шаралар алдағы уақытта жалғасын табатын болады, – деді аудандық мәдениет және тілдерді дамыту бөлімі басшысы Анар Қалдыбаева.
Сайыс қорытындысында І орынды Ғафурдин Жанұзақов атындағы Айдарлы ауылдық клубы, ІІ орынды аудандық мәдениет үйі, ІІІ орынды Тереңөзек кенті клубы, иеленді. Барлық жеңімпаз бен жүлдегерге бағалы сыйлық пен арнайы диплом тапсырылды.
Ақтоты ӨТЕПБЕРГЕНОВА
