Жас тілші – жүлдегерлер қатарында
Студент жылдары қарымды қаламгер, журналист, белгілі баспасөз саласының майталманы Жақсылық Рахматулланың шығармашылық еңбегіне тереңнен қанықтық. Қолына қалам алып, қоғамның түйткілді дүниесін мақаласына арқау еткен ел ағасы Қойлақы Сабылт атты бүркеншік есімімен талай мәселені көтере білген. Міне, жастардың жол бастаушысы болған Жақсылық Рахматулланың туғанына биыл 80 жыл толды. Осы орайда «Сыр бойы» газетінің байырғы редакторы, жазушы-журналист Жақсылық Рахматулланы еске алуға арналған «Қызылорда – құндылықтар қаласы» атты облыстық байқауда әріптесіміз, «Тіршілік тынысы» газетінің тілшісі Гүлсезім Табынбай жүлделі орыннан көрінді.Бірнеше күнге созылған облыстық байқаудың қорытындысы Әбділда Тәжібаев атындағы әмбебап кітапханасында қорытындыланды. Аталған байқауда басылым тілшісі Гүлсезім Жансерікқызының «Қазақ атауымен ұштасқан Қызылорда тарихы» тақырыбындағы мақаласы қазылар шешімімен жүлделі ІІІ орынды жеңіп алды. Жас та болса, өз білімі мен біліктілігін байқатып келе жатқан әріптесіміз бұған дейін өзге де облыстық байқаулардан жүлдегер атанып жүр. Жас тілші еңбек адамы, медицина, спорт, мәдениет, тарих тақырыбында кеңінен қалам тербеп, шығармашылығын шыңдауда.
– Қашанда шығармашылық адамын шыңдайтын күнделікті газет жұмысымен бірге сан түрлі деңгейдегі байқау екені жасырын емес. Бұл ретте біздің әріптесіміз облыс көлемінде ұйымдастырылған байқауда мерейімізді тасытты. Халықаралық «Алаш» әдеби сыйлығының иегері Жақсылық Рахматулланың қазақ баспасөзінің өркендеуіне жасаған елеулі еңбегі ел жадында екені сөзсіз. Кейінгі буын қарымды қаламгерлердің жүріп өткен жолына қанығып, қаламның қуатын сезіне бермек. Өз кезегінде басылымның жас тілшісі Гүлсезім Жансерікқызының кезекті жеңісімен шын жүректен құттықтаймын, – деді аудандық «Тіршілік тынысы» газетінің бас редакторы Аружан Мұханбетқали.
Балтабай АЯБЕКҰЛЫ
Балтабай АЯБЕКҰЛЫ
