Қызылорда облысының қоғамдық даму басқармасының ұйымдастыруымен жер­­гі­­­­лік­ті журналистер арасында өткен бай­қау қорытындысы қаламгерлер мере­кесіне орайластырылған еді. Байқауға облыс орталы­ғы мен алыс-жақын аудандардан қатыс­қан журналистер тіл туралы басылым бетінде жарық көрген мақалаларын ұсынған. Жеңімпаздарды анықтау барысында танымдық әрі мәселе көтеріп, ұтымды шешу жолдарын ұсына алған қаламгерлерге басымдық берілген.

Жыл сайын дәстүрлі түрде ұйымдас­тырлатын байқау мемлекеттік тіл саясатын бұқа­ралық ақпарат құралдарында насихаттау жұмыстарын жандандыру, мемлекеттік тілдің өзекті мәселелеріне арналған мақала мен бағдарламалар арқылы оқырман танымын кеңейтуге бағытталған. Айта кетейік, атаулы байқау «Үздік мақала» және «Үздік теле және радиобағдарлама» номинациялары бойынша өткен.

Кәсіби мереке қарсаңында бас қосқан қаламгерлерді облыстық қоғамдық даму басқар­масы басшысының орынбасары А.Қамбаров құттықтап, еңбектеріне табыс тіледі. Сондай-ақ сайысқа келіп түскен материалдарды Қазақстан Жазушылар одағы облыс­тық филиалының төрағасы Қ.Есімсейітова бастаған қазылар алқа­сы сараптаған. Жиын барысында сарапшы журналист байқауда бақ сынаған мақалалардың деңгейі тура­лы пікірін ортаға сала отырып, әріп­тестерін мерекемен құттықтады.

Байқау қорытындысымен І орынға «Тіршілік тынысы» газетінің бас редакторы, ақын Ақтөре Ибрагимұлы, ІІ орынға Арал ауданының құрметті журна­лисі Жаңабай Кемал, ІІІ орынға «Жала­ғаш жаршысы» газеті бас редакторының орынбасары Жандос Жазкен лайықты деп табылды. Ал, ынталандыру сыйлы­ғына «Qyzylorda» телеарнасының тілшісі Гүлай Әшекова, Арал аудандық «Толқын» қоғамдық-саяси газетінің тілшісі Оңталап Жолдасов, «Жаңақорған тынысы» газетінің тілшісі Мақпал Патенова ие болды. Байқау жүлдегерлері басқарма басшысының Алғыс хатымен және естелік сыйлықтармен марапатталды.