Мәртебесі биік қариялар
Ардагерлерді ардақтау – бұрыннан келе жатқан үрдіс. «Жұмысшы мамандықтар» жылы аясында еңбек адамына құрмет көрсету – құптарлық іс. Жақында Тереңөзек кенті әкімдігінің қолдауымен, аудандық ардагерлер кеңесінің бастамасымен бірнеше ардагерге зор ілтипат жасалды.Аудандық ардагерлер кеңесінің төрағасы Мұса Келдібаев бастаған зиялы қауым өкілдері сан салада еңбек еткен ардагерлердің үйіне барды. Талай жыл қызметімен танылып, ел құрметіне бөленген қазыналы қарттың көпшілігі денсаулығына байланысты жүріп-тұруы қиындаған. Бейнеттен белі бүгіліп, әрбір жұмыстың қиындығын сезінген жандар құрметті меймандармен дидарласып, өмір жолына тоқталды.
– Айбыны мықты азаматтар мен ақ жаулықты аналардың ғұмыр жолына тереңдесек, бір кітапқа жүк болатын тарих жатыр. Тереңөзек кенті әкімдігі бастамамызды қолдап, бірқатар қарияны қуантуға тырыстық. Ауданның әлеуметтік-экономикалық дамуына үлес қосқан жандар қашанда құрметке бөленетіні рас. Олар бізге ақ батасын беріп, шынайы лебізін білдірді. Алдағы уақытта мұндай ізгілікті іс-шара жалғасын таба бермек, – деді Тереңөзек кенті ардагерлер кеңесінің төрағасы Сталбек Тобағұлов.
«Тт» ақпарат
