Адамдар бір тәуліктің орта есеппен 3-4 сағатын әлеуметтік желіге жұмсайды. Ал кәмелетке толмаған балалар мен жастар 5-6 сағаттап желідегі сан түрлі дүниеге алданатыны тағы бар. Ең маңыздысы – «инстаграм», «тик-ток», «ютуб» әлеуметтік желісі арқылы табыс табуға дағдыланған жандар өз кәсібін дөңгелентіп отыр. Монетизация ұғымына ие онлайн қызметтің адамға тиімділігі жоғары. Өз кезегінде кірістер комитетінің хабарлауынша, кірістердің барлық түріне, соның ішінде шетелдік компаниялардан түсетін кіріске салық төлену керек. Сонымен қатар елімізде заңды түрде жұмыс істейтін платформалардан төлем автоматты түрде ұсталады.

Айта кетейік, монетизация арқылы табыс табатын жандар 270 нысан бойынша декларация тапсыруға міндетті. Салық көлемі 10 пайызды құрайды. Әлеуметтік желі арқылы қызмет көзін тапқан жандар жұмысшы жалдамайтын болса, жеке кәсіпкер ретінде тіркелудің қажеті болмайды. Бұл ретте, қажеттілік туындаған уақытта банк көшірімі мен әлеуметтік желідегі монетизация мәліметін көрсетуі тиіс.