Махаббат мұнарасын тұрғызған жұп
Танымал ақын, бірнеше жинақтың авторы, «Шабыт» фестивалінің лауреаты, облыс әкімінің «Тұран» сыйлығының иегері Нұрмұхаммед Әбілқасымов талантымен талайды тәнті қылғаны ел есінде. Өзге ақындардан ерекшелігі оның мүмкіндігі шектеулі жан бола тұра аузымен қаламды тістеп, өлең жазатыны оқырман қауымның таңданысын тудырды. Ақынның бабын тауып, өмірлік серігіне айналған аяулы жары Айгерім Нұрлановамен сұхбаттасудың сәті түскен болатын. Бүгінде 2 перзенттің анасы Айгеріммен эксклюзивті әңгімені назарларыңызға ұсынамыз.– Айгерім Қуанышқызы, ақынның жары ретінде ер азаматыңыздың қандай қасиетін бағалайсыз?
– Мен жар таңдауда еш қателеспеген екенмін. Нұрекеңнің әйел затына деген құрметі ерекше. Оның бойындағы басты қасиеті зайыбын барынша сыйлауы деп білемін. Қолынан келгенше қолдап отырады. Ешқашан жалған сөйлемейді. Өтірік айтқанды жек көреді. Шынайы, шындықты айтып, өз ұстанымынан таймайды. Балаларына әркез қамқорлығын танытып отырады. Нәзік жанды жаратылыс иесі болғандықтан, ер азаматымыздан мейірім, жылулық күтетініміз рас.
– Нұрмұхаммед ақын сізге қанша өлең арнады? Өзіңізге ұнайтыны қайсысы?
– Негізінен, ақынның жары болу оңай емес. Барлық сырды қас-қабағынан ұғынып отырамын. Оның жүректен шыққан өлеңдері адам санасын баурап алатыны сөзсіз. Кеңпейілді ер азаматым, аяулы жарым маған арнап бірнеше өлең жазғаны бар. Өзіме ұнайтыны: – Бойдағымда, жаным жалғыз жүдеді шын,
Ел алдында орындалды,тілегім шын.
Адастырмай жолымнан, Тәңір берген,
Сен менің жүрегімсің, тірегімсің, – деген өлең жолдарынан басталатын «Жан жарыма» туындысы. Жақында жолдасымның жаңа кітабы жарық көреді деп жоспарлануда. Облыс орталығында кітаптың тұсауын кеспекшіміз.
– Қазақтың дарынды азаматымен қалай таныстыңыз? Бақыт деген ұғымның құндылығын сезіне алдыңыз ба?
– Екеумізді Алла Тағала қосты десем, қателеспеймін. Біз облыстық спорттық жарысқа барғанда танысқан едік. Нұрекең шахматтан бақ сынаса, мен үстел теннисінен өз шеберлігімді байқата алдым. Бірте-бірте тіл табыса келе, жұбымыз жарасып, арманымыз ортақ мүддеге айналды. Әрине, бақыт деген ұғымды алғаш перзент сүйген кезімде сезіндім. Ана бақытын сезініп, айрықша қуанышқа кенелдім.
– Жолдасыңыздың мінезін бірнеше сөзбен суреттеп бересіз бе?
– Шындығында, сан түрлі болатыны жасырын емес. Өлең кұдіретін тереңнен сезінген жолдасымның көңіл-күйіне аса мән беремін. Кейде ашуға мініп, жауатын қара бұлттай көрінеді. Ал көңілді күліп отырса, күндей жарқырай түседі. Ақын жанын түсіне білген адам оның жаратылысында тылсым күш болатынын сезіне алады. Әрбір өлең шумағында зор тебіреністі, толқынысты, өмірге деген көзқарасты сезінуге болады.
– Жиі сырласасыздар ма?
– Бір-бірімізден сыр жасырмаймыз. Кейде сағаттап өткен күнді еске аламыз. Болашақты бағдарлаймыз. Балаларымыздың ертеңгі күніне жоспар құрамыз. Көп істе ақылдасып, ортақ шешім қабылдаймыз. Нұрекең өзі хақында «Арбадағы ақын жолы» тақырыбында мөлтек сыр жазған еді. Сонда балалық шағының қиындыққа толы кезеңі суреттеледі. Екеуміздің танысқан кездегі ішкі сезімі мен толқынысын керемет баяндайды.
– Жаратылысы ерекше жанның зайыбы ретінде бастан өткерген қызық оқиғаларыңызды айтып бересіз бе?
– Қызықты оқиға дейсіз бе? Біздің ең қызықты әрі тәтті, бақытты сәтіміз егіздеріміздің дүниеге келгені болар. Аяулы жарым мен «Перзентханада» жатқанымда ақын Қалқаман Сариннен сүйінші сұрапты. Қуанышты жаңалықты естіген ақын «Инстаграм» желісіне жариялап, дүйім жұртты хабардар етіпті. Жолдасым Қалқаман ақынға сәбилеріміздің есімін қоюға ұсыныс жасапты. Біз Қалқаман мен Қарақаттың ата-анасымыз.
Балтабай ОРДАБЕКОВ
