Тіршілік тынысы Tirshilik-tynysy.kz ақпараттық агенттігі
» » Жерлесіміз – «Тұран» сыйлығының иегері

Жерлесіміз – «Тұран» сыйлығының иегері

Облыс орталығында аймақ басшысы Нұрлыбек Нәлібаевтың қатысуымен Мәдениет және өнер қызметкерлері күніне арналған салтанатты іс-шара өтті. Облыс әкімі Сыр елінің мәдениет қызметкерлері мен сала арда­герлерін кәсіби мерекемен құттықтап, марапат табыс етті.

– Ел Президенті Қ.Тоқаев «Ұлт мәдениеті – халық өмірінің айнасы, оның болмысы. ­Сол себепті азаматтарымыздың рухы әрқашан биік болуы үшін мәдениетімізге, яғни, ру­ханиятымызға баса мән бергеніміз жөн» деген болатын. Бүгін Өздеріңізге ақжолтай жаңалықпен келдік. «Сырдың елі – жырдың елі» атанған қасиетті мекеннің абыройын асырып, бақ-беделін сақтауға үлес қосушы мәдениет және өнер, әдебиет өкілдерінің сан жылдан бергі тілегі – облыс әкімінің мә­дениет және әдебиет өкілдеріне арналған «Тұран» сыйлығын табыстайтын боламыз. Жүлде қоры 500 мың теңгені құрайтын облыс әкімінің сыйлығы әдебиет пен өнер өкілдерінің шығармашылығын шыңдауға сеп­тігін тигізетініне сенімдімін. Он жылдан­ астам уақыттан соң арасы үзіліп қалған дәстүрді қайта жалғадық. Талай дарын мен та­лант түлеген Сыр өңірінде мұндай сыйлық пен марапаттың болуы – заңдылық, – деді аймақ басшысы.

Өңір басшысы аймақ мәдениетінің дамуына үлес қосып жүрген өнер майталмандары мен ардагерлерін ҚР Мәдениет және спорт министрлігінің «Еңбек ардагері» және «Мәдениет саласының үздігі» төсбелгісімен марапаттады. Сондай-ақ 20 өнер иесіне 500 мың теңгелік сертификаты бар «Тұран» сыйлығын табыс етті. Мұнан бөлек, ай­мақтың бірқатар мәдениет саласының қыз­меткері Қызылорда облысының «Құрмет» грамотасымен, облыс әкімінің Алғыс хатымен марапатталды. Аймақтың мәдениет ұйымдарындағы 8 өнер ұжымына 40 домбыра тарту етілді.

«Тұран» сыйлығымен марапатталған­дар­­дың арасында сырдариялық ақын, Сыр­дария ауданының Құрметті азаматы Нұр­мұхамед Әбілқасымов бар.

– Білімді құмарланып терең қаздым,
Түбіне түскендеймін кемел наздың.
Аяқ-қолым ырқыма көнбеген соң,
Аузыма ағаш тістеп, өлең жаздым, – деп жырлаған ақын өзіндік өлең мәнерімен көпшіліктің құрметіне бөленген. Оның түй­дек-түйдек жырлары кімді де болса селт еткізбей қоймайды. Оның «Тағдырымның жа­нары», «Тасжарған» өлеңдер жинағы жа­рық көрген.

Нұрмұхамед Әбілқасымов – қазақтың қаһарманы Бауыржан Момышұлы атындағы «Намыс» төсбелгісінің иегері, «Шабыт» жас­тар фестивалінің дипломанты, «Алтын қауырсын» номинациясының лауреаты, «Жан­шуақ» қоғамдық сыйлығының иегері. Сон­дай-ақ шахматтан мүмкіндігі шектеулі жан­дар арасында облыс жеңімпазы, облыс әкімінің стипендиаты, «Лукойл» ком­паниясының грант иегері. Тағдыр қанша тартқыласа да табаны таймаған, өмірге соншалықты құштар, рухы биік азамат­тың жігері, қиындыққа мойымайтын қайсарлығы өз алдына бөлек тақырып. Өңірдің, еліміздің мәдениеті мен өнеріне, поэзиясына өзіндік үлес қосып жүрген жерлесімізді кезекті же­тістігімен құттықтаймыз!

Атаулы күнге арналған салтанатты іс-ша­ра соңы жергілікті өнерпаздардың қаты­суымен концерттік бағдарламаға ұласты.

Е.БЕРКІНБАЕВ
20 мамыр 2023 ж. 276 0