Тұрар Рысқұловтың 130 жылды­ғына арналған тағылымы мол кеште мектеп оқушылары тұғырлы тұлғаның өмір жолына байланысты баяндама жасады. Өткен ғасырдың басында саяси аренада өзіндік орнын қалыптастыра білген қайраткердің қызмет еткен жылдары сараланды. Ел мүддесін жоғары қоятын Алаш ардақтысы жөнінде көптеген тарихи зерттеу дерегі негізге алынды.

– Тұрар Рысқұловтың қызметі мен идеялары Қазақстанның даму тарихында ерекше орын алады. Арда азамат ұлттық бірлік пен әлеуметтік әділеттілікті басты мақсат ретінде қарастырған көрнекті тұлға. Оның мұрасы қазіргі ұрпаққа үлгі болып, Қазақстанның тәуелсіз даму жолындағы құндылығын бекітуге септігін тигізуде. Тұрар Рысқұлов ұлттың болашағы үшін өз өмірін арнап, қазақ халқының дербестігі мен тәуелсіздігін қорғауға тырысты. Шын мәнінде, біздер мектеп бағдарламасы аясында ел үшін күрескер атанған тұлғаның ерен еңбегін оқушы санасына тереңнен сіңіреміз. «Тұтас Түркістан» жобасымен есімі тығыз байланысты атанған қазақтың біртуар перзенті түркі жұртының азаттығын аңсаған зиялы қауымның белді өкілі саналады, – дейді мектеп-лицейдің тарих пәнінің мұғалімі Нұргүл Мұсаева.

Бұл ретте, мектеп оқушылары «Ашық микрофон» айдарында өз ойларын ортаға салды. Сонымен қатар Тұрар Рысқұловтың қызметі, тың еңбегі жөнінде дайындалған бірнеше сұраққа жауап берді.