Биыл «Мағжан және К» ЖШС 4500 гектар жерге Сырдың бас­ты дақылын еккен. Ерте көктемнен бастау алған егін науқаны ала жаздай тоқтаусыз жүргізілді. Тынымсыз еңбектің нәтижесінде қамба астыққа толды. 450 адамды жұмыспен қамтып отырған іргелі шаруашылық орта есеппен 68,5 центнер өнім алған. Осындай мерейлі сәтте «Қазақстанның Еңбек Ері» Абзал Ералиев диқан қауымды молшылық мерекесімен құттықтады.

– Жыл сайын өлшеусіз еңбектің жемісін көріп келеміз. Аптап ыстықта шыдамдылық танытып, күріштің әрбір сұрыпына күтім жасаған сала мамандары бар мақтауға лайық. Ата-бабадан келе жатқан кәсіпті жастар көптеп меңгеріп, қажыр-қайратын танытуда. Дегенмен, біз аға буынның тәжірибесіне иек артамыз. Мемлекет тарапынан ауыл шаруашылығы саласын өркендетуге барынша көңіл бөлінуде. Біз әр жылдары сан түрлі күріш дақылын орналастыруға мүдделіміз. Баршаңызды айтулы күнмен құттықтаймын, – деді Абзал Жұмашұлы.

Салтанатты іс-шарада дала еңбеккерлері құр­мет төрінен көрінді. «Жыл үздіктері» марапатталып, оларға қаржылай сыйлық табысталды. Сонымен қатар «Мағжан және К» ЖШС-іне қарасты МТМ мең­герушісі Тал­ғат Жүні­совке, механизатор Қарабай Башаровқа, сушы Қайрат Найзатаевқа жаңа авто­көліктің кілті беріл­ді.

– Ауыл шар­уа­шылы­ғы сала­сы – ұлттық эко­номиканың құрамдас бөлігі. Аграрлық өңір­де ерекше серпіліс бар. Қазақ халқы «Көп еңбек еткенге бақыт басын иеді» деп бекер айтпаған. Шаруашылық қызметкерлері дамылсыз еңбек етіп, орасан жетістікке қол жеткізуде. Үздіктер қатарынан көрінген әр маманның шаруашылықта өзіндік орны қалыптасқан. Жыл қорытындысы бойынша 3 маманға автокөлік беруге ұжым болып шешім қабылдадық. Әрине, еңбекті бағалаған абзал, – деді Дархан Жұмашұлы.

Дала еңбеккерлерінің торқалы тойында эстрада жұлдыздары ән айтып, би биледі. Аудан өнерпаздары да өнер көрсетті.