Балық аулау байқауы
Отбасы күні аясында «Отбасыммен табиғат аясында» аудандық отбасылық әуесқой балық аулаушылар сайысы өтті. Табиғатпен үндесе отырып, отбасы құндылығын арттыруды мақсат еткен іс-шараға аудандық мәдениет және тілдерді дамыту бөлімі мен Ақжарма ауылдық округі әкімдігі қолдау көрсетсе, байқаудың жоғары деңгейде өтуіне Ақжарма ауылдық мәдениет үйі жауапты болды.Аталған сайысқа барлығы 6 команда қатысты. Әкесі мен баласы немесе өзге де отбасы мүшелерімен бірге келген қатысушылар байқауға үлкен ынтамен ден қойды. Әр команда екі адамнан құралса, байқау бір ғана кезеңнен тұрды. Жыл сайын тұрақты түрде ұйымдастырылып жүрген сайысқа аудандық мәслихат депутаттары, Ақжарма ауылдық мәдениет үйі директоры Айтмағанбет Темірханов, қауіпсіздік саласы қызметкерлері қатысып, балықшыларға сәттілік тіледі.
Қалғандария жағажайында өткен балықшылар сайысына жүлделі орындар мен бағалы сыйлықтар тігілді. Арнайы жеребе арқылы реттілік таңдалып, балықшылар сайысқа қызу кірісті. Балық аулау байқауына Көшербаевтар, Сейтмұратовтар, Мясцовтар, Тасбергеновтер, Күншығаровтар, Нұғымановтар отбасы қатысты. Әділ қазылардың шешімімен І орын тереңөзектік Мясцовтар отбасына бұйырды. Ал ІІ орынды Шаған ауылынан келген Тасбергеновтер жеңіп алды. ІІІ орын Ақжарма ауылынан қатысқан Нұғымановтар отбасына бұйырды. Сондай-ақ ең үлкен балық ұстаушы да сый-сияпаттан құр қалмады. Байқау бойына ерекше ынта танытып, ең үлкен балықты ұстаған «Шаған» командасының қатысушысы Бексейіт Аян «Big Fish» аталымымен марапатталып, сыйлыққа газ плитасын жеңіп алды.
– Балық аулау адамға жан тыныштығын сыйлайды. Бұл – табиғатпен үндестіктің бірден-бір көзі. Бір жағынан әкеден балаға тәрбие болар үлгі-өнеге. Сол себепті жыл сайын дәстүрлі түрде балық аулау сайысы өтіп тұрады. Балық аулаудың арнайы ереже, тәртібі, сондай-ақ өзіндік маусымы болады. Кезекті сайысымыз жоғары деңгейде өтті деуге негіз бар. Табиғат аясында, таза ауада бір сәт сергіп әрі пайдалы іспен шұғылдануға негізделген сайысқа біреулер інісімен, енді бірі баласымен қатысты. Аудандық ауруханадан жедел-жәрдем көлігін, төтенше жағдайлар бөлімінен құтқару жасағын алдырып, қатысушы отбасылардың қауіпсіздігін бірінші орынға қойдық. Сайыс қорытындысы бойынша жеңімпаздар арнайы диплом және бағалы сыйлықтармен марапатталды, – дейді республикалық спорттық балық аулау жарыстарының қатысушысы, облыстық, қалалық деңгейдегі балық аулау сайыстарының жеңімпазы, сайыс төрешісі Айтмағанбет Серікбайұлы.
А.МҰХАНБЕТҚАЛИ
