Республикалық турнир жеңімпазы
Газетіміздің 18-інші тамыз күнгі 64-інші нөмірінде «Тоғызқұмалақ турнирінде топ жарды» тақырыбында мақала жарияланған болатын. Мақалада облыстық мәслихаттың және тоғызқұмалақ зияткерлік қауымдастығының ұйымдастыруымен «Абай жүлдесі» атты тоғызқұмалақтан облыстық турнир өтіп, аудандық мәслихаттың намысын қорғаған Райкүл Ешмұратованың республикаға жолдама алғаны жазылған еді.Облыстық кезеңді ойдағыдай аяқтап, республикалық турнирге қатысу мүмкіндігіне ие болған Райкүл Ешмұратова Астанадан жағымды жаңалықпен хабарласты. Ұлттық спорттың қыр-сырын терең меңгерген ол бұл жолы жүлделі екінші орынды жеңіп алды. Осылайша мәслихаттардың құрылғанына 30 жыл толуына орай ұйымдастырылған жарыс қорытындысында жерлесіміз жеңіс тұғырынан көрініп, аудан абыройын асқақтатты.
Іс-шараның ашылу салтанатында ҚР Парламент Сенатының Депутаты Геннадий Шиповских сөз алып, ҚР Парламент Сенатының Төрағасы Мәулен Әшімбаевтың құттықтау хатын жеткізді. Мұнан соң Қазақстан Республикасы Тоғызқұмалақ спорты федерациясының Президенті Әлихан Бәйменов турнирдің сәтті өтуіне тілектестігін білдіріп, өңірлерден келген қатысушыларға жеңіс тіледі.
– Еліміздің әлеуметтік-экономикалық дамуын қамтамасыз етуде мәслихаттардың алатын орны ерекше. «Абай жүлдесі» тоғызқұмалақ турнирі мәслихаттардың құрылғанына 30 жыл толуына орай ұйымдастырылып, әуелі облыстық кезең өткізілді. Біз бұл атаулы мерекені стратегиялық ойлау қабілетін дамытатын іс-шараларды ұйымдастыру арқылы атап өтуді жөн көрдік. Бүгін «Абай жүлдесі» тоғызқұмалақ турнирінің ашылу салтанатында өңірлерден келген қатысушылармен кездескенімізге қуаныштымыз. Тоғызқұмалақтан еліміздің рейтингтік көрсеткіштері соңғы үш жылда алғашқы орындарды иеленіп келеді. Қазіргі таңда тоғызқұмалақ спорты еліміздің барлық өңірінде қарқынды дамуда. Сол себепті алдағы уақытта бұл бастаманы одан әрі жалғастырып, осындай турнирлерді жиі өткізуге белсене атсалысуымыз қажет, – деді Әлихан Бәйменов.
Айта кетсек, турнирде барлық деңгейдегі мәслихат аппаратының қызметкерлері, қоғам белсенділері және БАҚ өкілдері қатысып, бақ сынасты. Сырдария ауданының намысын қорғаған Райкүл Ешмұратова жүлделі ІІ орынмен және арнайы алғыс хатпен, естелік сыйлықпен марапатталды. Қызылорда облысының құрамасына да жалпыкомандалық есепте ІІ орын берілді.
– Жарысқа қатысқаныма қуаныштымын. Қолдау білдірген аудандық мәслихат аппаратына алғысым шексіз. Ауданымызды дамыту бағытында жергілікті атқарушы органмен бірлесе жұмыс істеп жатқан мәслихат ұжымына, депутаттарға сәттілік тілеймін, – дейді Райкүл Ешмұратова.
А.ҚҰРМАНАЙТЕГІ
