Әр нөмерін асыға күтеміз
![](/uploads/posts/2023-12/medium/1702360708_madina.jpg)
Соңғы уақытта газеттің мазмұны мен дизайнында ерекше жаңашылдық орын алып келеді. Аудандағы негізгі жаңалықтармен қатар, танымдық, тәрбиелік мәні зор тарихи мақалалар көптеп басылып жүр. Бұл – 85 жылдық тарихы бар төл басылымның жаңа белесі десек болады. Әр жылдары жаңа, бір-біріне ұқсамайтын ерекшелігімен оқырманын қуантып келе жатқан газетке тұрақты түрде жазыламыз.
Сондай-ақ басылымның жылдам әрі тиімді жұмыс жасайтын электронды сайтының жұмысын жоғары бағалауға болады. Қазіргі заман ақпараттық технологиялар заманы болғандықтан, кейде газетті алдымен ресми сайттағы нұсқасынан оқып аламыз. Әрі қолжетімді, әрі тиімді.
Газет – адамға ауадай қажет құндылық. Қазіргі таңда «газет көп оқылмайды» деген пікір де жоқ емес. Мен бұл пікірді толықтай жоққа шығарар едім. Себебі жалған ақпараты көп әлеуметтік желіден гөрі ресми, сенімді ақпараттар һәм басылымды қолға ұстап, сүйсіне оқығанның әсері ерекше. Осы ретте оқырманға сапалы ақпарат таратып, баспасөз саласында өзіндік орнын қалыптастырған аудандық газет ұжымына шығармашылық табыс, ізденісті серік еткен журналистерге сәттілік тілеймін!
Мәдина ОМАРОВА,
жеке кәсіпкер