Облыстық байқауда топ жарды
![](/uploads/posts/2023-10/medium/1698464954_img-20231021-wa0060.jpg)
Ә.Тәжібаев атындағы Қызылорда облыстық әмбебап ғылыми кітапханасында «Гүлдене бер, Қазақстан» атты жас ақындар мүшәйрасы ұйымдастырылды. Жас ақындардың шығармашылығын қолдау, оқушыларға қанша жылдан кейін ұлтпен қайта қауышқан ұлттық мерекенің мәні мен маңызын насихаттау мақсатында өткізілген сайысқа аудан және қала мектептерінің оқушылары қатысқан. Байқау нәтижесі біздің аудан үшін жемісті болып, Ақжарма ауылдық кітапханасының оқырмандары көп ішінен дара шыққан. Аталған облыстық байқауға Сырдария ауданынан үш оқушы қатысқан. Олардың бірі бас жүлдені, біреуі бірінші орынды қанжығаға байлаған. Ал аманкелділік жас ақын арнайы «Алғыс хатпен» марапатталған.
Республика күні қарсаңында өткен облыстық «Гүлдене бер, Қазақстан» жас ақындар мүшәйрасына барлығы 12 жас ақын қатысқан. Сайыс талаптарына сәйкес қатысушылар үш кезең бойынша сынға түскен. Бірінші бөлім «Әдепті елдің баласы алыстан сәлем береді» деп аталған. Бұл кезең бойынша қатысушылар өзін-өзі таныстырған. Ал екінші кезең «Гүлдене бер, Қазақстан» делініп, бұл бойынша жас ақындар өздерінің жүрекжарды жыр шумақтарын Республика күніне арнап оқыды. Одан кейінгі кезең «Жаныма жақын жырларым» деп аталды. Бұл бөлімде жас ақындар өз жанына жақын, еркін тақырыптағы бір өлеңін тыңдарман назарына ұсынған. Алдын ала белгіленген ереже бойынша қатысушылар байқауға бұрын-соңды ақпарат құралдарында жарияланбаған өлеңдерін ұсынған. Сондай-ақ талапкерлердің жас ерекшелігі 11-15 жас аралығы деп бекітілген.
Еркін ойды көсіле жырлап, тыңдарман мен қазылар алқасының көңілінен шыққан ақжармалық оқырман Диана Батырбек бас жүлдені, Айхан Арысбек бірінші орынды жеңіп алған. Оқушыларды ауылдық кітапхана кітапханашысы А.Айқынбаева дайындап, додаға қосқан. Қос оқушы да ауылдық округтегі №130 Абай атындағы орта мектепте білім алуда. Бүгінде 6 сыныптың үздік оқушылары бұған дейін де түрлі байқауларда топ жарып, қатарластарынан оза шауып келеді. Ұлттық мереке қарсаңында ұйымдастырылған облыстық байқауға да тыңғылықты дайындалып, жеңіске нық қадам басқан.
– Диана да, Айхан да – өте зерек оқушылар әрі кітапхананың тұрақты оқырмандары. Әркез кітапхана ұйымдастырған іс-шараларға белсене қатысып, үздіктер қатарынан көрініп келеді. Облыстық әмбебап ғылыми кітапхана мереке қарсаңында байқау ұйымдастырғаны туралы ақпарат келген күннен бастап екі оқушым белсенді түрде дайындыққа кірісті. Олар жүрекжарды өлең шумақтарын шығарып алып келді. Балалардың сахна мәдениетін сақтауы мен жүріс-тұрысына дейін жүйелі түрде дайындық жүргіздік. Адал еңбектің еш болмайтыны анық. Нәтижесінде қос оқушым да жүлделі орындарды иеленіп, еңбектің жемісін қайтарды. Сонымен қатар аудан намысын қорғаған аманкелділік Жайна Өркен есімді оқушы жетекшісі Гүлзада Бұрхановамен бірге тыңғылықты дайындалып келгені көрініп тұр. Аманкелділік әріптестер «Алғыс хатқа» ие болып, аудан мерейі үстем болды, – дейді Ақжарма ауылдық кітапханасының кітапханашысы А.Айқынбаева.
Сайысқа қатысушыларға ақындар А.Берік, А.Сайлауов, Өнер бөлімінің меңгерушісі К.Юсупова төрелік еткен. Жеңімпаз ақындар арнайы дипломмен және сый-сияпатпен марапатталған.
А.МҰХАНБЕТҚАЛИ