Ардагерлердің батасын алды

Биылдан бас­тап азаматтық хал актілерін тіркеу бөлімі еліміз бойынша қайта құрылды. Бірнеше мәрте сан салаға бірік­тірілген аталған бөлімнің қыз­мет көрсету аясы кеңейіп, «Азаматтарға арналған үкімет» мем­лекеттік корпорациясы» КЕАҚ құрамында қызмет ете бас­тады. Жақында азаматтық хал актілерін тіркеу бөлімінің басшысы Салтанат Бекжүнісова сала арда­гер­лері­нің басын қосып, кездесу өткізді.

Кездесуге облыстық мәслихат депутаты Жұмабек Ембергенов, сала ардагерлері мен мамандары қатысты. Кездесу барысында азаматтық хал актілерін теркеу бөлімінің басшысы С.Бекжүнісова бүгінде жергілікті халық үшін жүзеге асырылатын қызмет түрлерін жиналған көпшілікке таныстырды.

– Шілде айынан бастап өз алдына мекеме болып құрылып, бөлімде төрт маман жұмыс жасаудамыз. Бұрнағы күні жас отаудың алғашқы некесін қиып, салтанатты рәсім өткіздік. Біздің саламыздың алға жылжуына өзін­дік үлес қосқан Әсия Масилова, Алтын Есболғанова, Шырынкүл Елеусінқызы секілді арда­герлеріміздің еңбегі ерен. Ардақты жандардың қолы тиген құн­ды құжаттар бөлімнің архивінде сақтаулы. Негізінен, бөлім тарапынан жергілікті халыққа неке қию және неке бұзу туралы куәлік, Туу туралы куәлік, қайтыс болу туралы куәлік пен бірнеше анықтама беріледі, – деді бөлім басшысы.

Облыстық мәслихат депутаты Ж.Ембергенов, сала ардагерлері Ә.Масилова, А.Есболғанова, ақжар­ма тілектерін жет­кізді. Сонымен қа­тар осы салада қызмет жасаған Ж.Бағдатқызы жылы лебізін білдірді.

– Жылдар бойы әлеуметтік саламен біріккен АХАТ бөлімі өз алдына бөлек шыққанына қуаныштымыз. Біз аудандағы әрбір отбасымен тығыз байланыс орнатып, сапалы қызмет көрсетуге тырыстық. Неке қию рәсімдерін салтанатты түрде өткізіп, жас жұбайлардың қуанышына ортақтастық. Сондай-ақ ата-аналарға туу туралы куәлік беріп жатып, балаларының үлкен азамат болып өсуіне тілектестік білдірдік. Сала мамандарының алдағы қызметіне сәттілік тілейміз, – деді ардақты ардагер Әсия Масилова.

Айта кетейік, кездесуде сала ардагерлеріне арнайы құрмет көрсетіліп, сый-сияпат ұсынылды.

Балтабай ОРДАБЕКОВ