Тәжірибелі басшы, тегеурінді менеджер

Тамыздың бірінші жексенбісінде «Көлік қызметкерлері күні» кәсіби мерекесі жыл сайын аталып өтіледі. Мерекеге орай бас редактордың тапсырмасымен темір жол саласының негізгі атқаратын қызметі туралы тәжірибелі басшы Абзал Әмірбекұлымен дидарласу сәті түсті. Өзіндік іскерлігімен іргелі ұжымның қызметін үйлестіріп отырған сала жетекшісі темір жол қызметінің қыр-сырына тереңнен қаныққан.

Жалпы, Қараөзек және Қара­кеткен елді мекенінің арасындағы пойыз қозғалысының жол қауіп­сіз­дігін қамтамасыз ететін бірінші телім­де 73 маман еңбек етеді. Аталған мекемеге осыдан бес жыл бұрын басшы ретінде қызметке тағайындалған Абзал Айтжанов – Тереңөзек кенті­нің төл перзенті. Ол – №210 Оспан Әбілпаттаев атындағы орта мектепте білім алып, ұстаздардың үкілеген үмі­тін ақтаған. Бала күнгі арманына қол жеткізу үшін Абзал Әмірбекұлы «Қа­зақ көлік және коммуникация­­лар» академиясынан «Жол және жол шаруашылығы» мамандығын мең­­геріп шығады. Кейіпкеріміз осыдан жиырма жыл бұрын Шиелі станция­­сында еңбек жолын бастапты. Араға бір жыл салып, туған жеріне оралған Абекең жол жөндеуші болып кәсіби біліктілігін арттырады. Сонымен бірге әр жыл­дары Жалағаш ауданында жол ше­бері, Тереңөзекте жол бригадирі, Қы­зылорда жол дис­­тан­циясында жүр­гі­зуші инженер қызметін абыроймен атқарады. Бұл ретте, сала басшы­сы қос аудан аралығын қамтитын меке­­ме жұ­мысын бізге саралап айтып берді.

– Біздің құзіретімізге 114 шақы­рым негізгі жол мен 16 шақырым станциялық жолдың қауіпсіздігін қам­тамасыз ету кіреді. Тәулігіне 35-40 пойыздың діттеген жеріне аман-есен жетуіне сала мамандары барын салады. Жалағаш ауданында 2, Тереңөзек кентінде 2 айналым жүйесі бойынша жұмысшылар қыз­мет атқарады. Мұнан бөлек 55 бағыттамалы бұр­ма жолымыз бар. Ал мекемеге қарас­ты 4 өткелдің 1-і күзетілмейтін, 3-і күзетпелі саналады. Кәсіби біліктілігі жоғары мамандарымыз өз ісіне мығым. Темір жол саласында қызмет ететін мамандарға төзімді болу бас­ты рөл ойнайды. Барлық жұмыстың толықтай жүзеге асуы ауа райына тіке­лей байланысты. Күні-түні пойыз қозғалысы тоқ­тамайтыны рас. Кейде жол қауіпсіздігін бақылау мақсатында мамандар шұғыл жұмылдырылады. Осындай уақытта шаршауды біл­мейтін, қызметіне адалдық танытатын әріптестерімнің еңбегін жоғары бағалаймын, – дейді сала басшысы.

Шойын жолдың бойында күні-түні дамыл көрмейтін әрбір қызметкерге күш-жігер мен шыдамдылық мінез аса қажет. Себебі, тозығы жеткен жолдарды жоспар бойынша қыз­меткерлер араға уақыт салып жөндесе, ағымдағы күтіп-ұстау қыз­меті күнделікті үйлестіріледі. Жа­ла­ғаш пен Тереңөзектің екі ортасын жол қыл­ған Абзал Айтжанов таңғы 05.00-ден жұмысшылардың жанынан та­­былады. Орын алған кез келген ол­қылықты орнына келтіріп, пойыз қоз­ғалысының тежелмеуіне жағ­дай жасайды.

Тәжірибелі басшы, іскер ұйымдас­тырушы Абзал Айтжанов жұмыста тегеурінді менеджер болса, отбасында жарының арқасүйер азаматы, баларының ардақты әкесі. Қазіргі уақытта зайыбы Ақманат Серікбаева екеуі 1 қыз, 3 ұлдың ата-анасы. Үйде­гі отанасы Ақманат Серібайқызы отбасы мүшелерінің бабын тауып қана қоймай, бала бағбаны атана білген. Аяулы жан №36 Әбділда Тәжібаев атындағы мектеп-лицейде математика пәнінен сабақ береді. Осы ретте, темір жол қызметінің ілгері басуына зор ықпал жасап келе жатқан Абзал Айтжановты кәсіби мерекесімен құттықтаймыз!

Балтабай АЯБЕКҰЛЫ