Есірткіге жол жоқ
Республика бойынша бастау алған «Есірткіге жол жоқ» жобасы аясында тиісті түсіндірме жұмыстары облысымызда да қарқынды түрде жүргізілуде. «АMANAT» партиясының Қызылорда облыстық филиалы жанындағы «Жастар рухы» жастар қанатының төрағасы Медет Жорабектің хаттамалық тапсырмасына сәйкес бұл бағыттағы іс-шаралар ауданымызда да ұйымдастырылды.Нашақорлық – бүкіл қоғамның қасіреті, болашағымызға үлкен қауіп төндіретін індет. Осы ретте «Есірткіге жол жоқ» жобасы аясында «AMANAT» партиясының Сырдария аудандық филиалы жанындағы «Жастар рухы» жастар қанаты мен аудандық жастар ресурстық орталығының бірлесе ұйымдастыруымен аудан орталығы мен ауылдық округтерде профилактикалық іс-шаралар өткізілді. Іс-шаралар барысында жастар көп шоғырланатын жерлерде тақырыптық кездесулер өтті.
Аудан ораталығында өткен кездесуде «Жастар рухы» жастар қанатының аудандағы жетекшісі, аудандық мәслихат депутаты А.Ибрагимұлы жастарды жат әдетке құмар болмауға шақырды. Сонымен қатар есірткінің зияны жөнінде баяндама жасап, есірткіні тұтыну мен жарнамалау қылмыс екенін айтты.
– Ұлттық құрылтайда Мемлекет басшысы жастарды жат әдеттен сақтандырудың маңыздылығына ерекше тоқталды. Бұл бәрімізге ой салуы керек. Сырдариялық жастар есірткі, наша секілді жат ұғымдардан аулақ болып, өзгелерге үлгі көрсетеді деп сенеміз, – деді ол.
Акция барысында «Сырдария жастары» еріктілер штабы еріктілері өз пікірлерін ортаға салды. Есірткі суреттері бейнеленген киімдерді сату, есірткі, психотроптық заттарды насихаттау, заңсыз жарнамалау заңмен қудаланатынын жеткізді. Мұнан бөлек аудандық полиция бөлімінің қызметкерлері де түсіндірме жұмыстарын жүргізіп, есірткімен, нашақорлықпен күрес кешенді түрде жүргізіліп жатқанынан хабардар етті.
Айта кету керек, бұл бағыттағы іс-шаралар алдағы уақытта да өз жалғасын тауып, партия жанындағы «Жастарды қолдау жөніндегі кеңес» отырысында қаралатын болады.
«ТТ» ақпарат
Фото: ашық дереккөзден
