Тіршілік тынысы Tirshilik-tynysy.kz ақпараттық агенттігі
» » Медбике – мәртебелі мамандық

Медбике – мәртебелі мамандық

Бірде-бір аурухана медбикесіз жұмысын өрбіте алмайды. Адам жанына араша түсіп, денсаулық түзеу ісінде дәрігерлерден кем орын алмайтын аса жауап­ты мамандық иелері – медбикелер. Науқас жанына инесімен де, ақ көңілімен де шипа сыйлайтын жандар 12 мамыр күні кәсіби мерекесін атап өтеді. Мерекеге орай аталған мамандық иелеріне басымдық беріп, халықтың көзі мен тілі болған басылым арқылы адал еңбекті насихаттауды жөн санадық.

Райса Анасованың мерейлі медбике қызметін атқарып келе жатқанына биыл 29 жыл. Өзінің жан қалауы, жүрек таңдауымен осы саланы меңгерген бі­лікті маман өзінің жұмысына үлкен жа­уапкершілікпен қарайды. 1975 жылы аудан орталығында дүниеге келген ол Қызылдихан ауылындағы орта мектеп­те білім алған. Жастайынан тағдыр тау­қыметін тартып, ата-анадан жастай айы­рылғанымен, өмірдің бұралаңдарына мо­йын бұрмауға тырысады. Өмір жолында кездескен кедергілер арманы асқақ, мақсаты айқын қыздың мықты әрі жігерлі болып өсуіне жол ашады.

Ағасы Сайфолланың қолында өсіп, тәрбиесін көрген Райса кішкентай күнінен адам жанына араша болған ақ халатты абзал жандарға қызығып өскен. Өзі де өскенде осы саланың қыры мен сырын меңгеруді арман еткен. Осы орайда 1992 жылы Қызылорда медициналық колледжіне оқуға түсіп, оқу ордасын екі жылдан соң үздік аяқтап шыққан. 1994 жылы алғашқы еңбек жолын бастап, күні бүгінге дейін медицина саласында абыройлы еңбек етіп келеді.

Біреуге сырлас құрбы, біреуге ақылшы әпке болып жүрген жан әріптестерінің арасында да үлкен беделге ие. Мереке қарсаңында сәті түскен бұл мақаламыз­ды жазбас бұрын да Райса Анасованың жақсы атын әріптестері аузынан естуіміз – сөзімізге дәлел. Кейіпкеріміз 1994 жыл­дан 2018 жылға дейін аудандық ау­ру­хананың жан сақтау бөлімінде аға медбике болып жұмыс жасап, тәжірибесін толықтырған. Кейін 2018 жылдан бастап бүгінгі күнге дейін аудандық аурухананың бас медбикесі болып қызмет етуде.

Қазір аға медбикенің қарамағында 400-ге жуық медбике бар. Аудандық ауруханадан бөлек, 13 елді мекен мен 17 мектеп медбикелерінің жұмысын Райса Анасқызы ұтымды ұйымдастырып, жүйе­лі жүргізіп отырады. Көпшілікке бас болып, шаруаны оңтайлы үйлестіру ерік-жігері мықты болмаса, нәзік жандылар үшін оңай болмасы анық. Осындай қызы­ғы мен қиыншылығы мол қызметті атқарып жүрген ақ халатты абзал жан ем іздеп келген адам­дардың ауруынан айығып, аяғына тік тұрғанын көруді бір бақыт деп біледі.
– Осы саланы өзіміз таңдап, өзіміз қа­лап келдік. Қиындығы да, қуанышы да қатар жүреді деп айта аламын. Күн-түн деп жатпай, уақытпен санаспай жұмыс істейміз. Кейде жұмыстан басқаға уақыт таппай қалатын кездер болады. Бірақ мамандыққа деген адалдық бірінші орында. Себебі біз таңдаған жұмыстың ар жағында қаншама халықтың тағдыры, денсаулығы, өмірі тұр. Оған бей-жай қа­рауға болмайды. Мамандығымды мақ­тан тұтамын. Ауыр жағдайда келген нау­қастардың жүзіне қан жүгіріп, тәуір болғанын көргенде құлшынысымыз артып, бірге қуанамыз, – дейді Райса Анас­қызы.

Қазіргі заманда әлем бір орында тұр­ған жоқ. Күн сайын жаңашылдық, жаңа техника... Қай салада болмасын ұдайы дамып, жетіліп, өсу маңызды. Осы ретте, медицина саласы да дамудың дара жолына бағыт алып келеді. Ал білікті мамандарға жаңашылдықты уақытылы игеріп, оны тәжірибеде қолдана алу маңызды. Аудан медбикелері әркез жаңа білімге ұмтылып, арнайы біліктілікті арттыру курстарынан өтіп тұрады. Кейіпкеріміз алдағы уақытта осы мақсатты арқау еткен семинарларды аудан орталығында тұрақты ұйымдастыру жоспары бар еке­нін айтты.

Жиырма тоғыз жыл бойы аталған салада абыройлы еңбек етіп келе жатқан жоғары санатты медбике аудан, облыс көлемінде Құрмет грамоталарымен және Алғыс хаттармен марапатталған. Финляндия елінің Хельсинки-Тампере қаласында біліктілігін арттырғанын да айта кеткеніміз жөн. Қызметтегі жеткен жетістіктері үшін ұдайы басшылық тараптың алғысы мен марапатына ие болып, мәртебесі артқан маман отбасы деген шағын мемлекеттің де аяулысы болып отырған жайы бар. Бүгінде екі қыз тәрбиелеп, немере сүйген асыл әже, ардақты жар, аяулы ана әр ісіне жауапкершілікпен қарайды.

Кәсіби мереке қарсаңында мерейлі мамандық иесін құттықтай отырып, қыз­метіне табыс, отбасына амандық, саулық тілейміз!

Аружан МҰХАНБЕТҚАЛИ
13 мамыр 2023 ж. 326 0