Райсаны бала күнімнен танимын. Бір жылдың түлектері ретінде мек­тепті қатар бітірдік. Райсаның сабырлы мінезін, оқуға деген ынтасын жақсы білемін десем артық айтқандық емес. Ата-анасынан ерте көз жазып қалған Райса – тоғыз бауырының ең кенжесі. Үлкен ағасы Сайфолланың қолында өсіп, тәрбие алған қаршадай қыз болашағын медицина саласымен байланыстырды. Мамандық таңдауда қателеспеген алғыр қыз медициналық колледжді ойдағыдай бітіріп, мейірбике ісі бо­йынша 1994 жылы диплом алды.

Жас мейірбике 19 жасында ау­дандық аурухананың жан сақтау бөлімшесіне өз мамандығы бойынша қызметке орналасады. Оның қыз­меттегі алғашқы ұстаздары анес­­­­­тезиолог-реаниматолог Б.Мыр­­зах­­метов, Р.Арғынбаев, М.Ман­тиев, С.Көшенова, аға мед­бикелер О.Махан­бетова, Ш.Жұман­ова, З.Сү­лей­ме­новалардан, хирург­-дәрі­гер Ш.Зетов, Б.Ердәу­летов­тен үйренгені көп.

– Медбикелер – медицинаның не­гізгі күші, дәрігердің сенімді се­рігі. Науқас келіп түскеннен аман-есен сауығып, аяғына нық тұрып кеткенге дейін жанашырлық танытып, қолынан келгенше аянбайды. Науқастың денсаулығына дә­рігерден кем жауап бермейді. Дә­рігер науқасты тексеріп, таға­йындауын берген соң, әрі қа­­рай бар жұмысты медбике орын­­дайды. Адамның жаны өмір мен өлімнің арасында тұрғанда әр секунд маңызды. Әрбір өзгерісті қалт жібермей, қа­дағалап, оны дәрігерге жеткізу – медбикенің міндеті. Медбике сонымен қатар егуін жасап, дәрі-дәрмегін уақытылы береді. Төсек-орын, ас-­ауқатын, жалпы халін бақылап, науқасқа қарайтын медбикелердің еңбегі ұшан-теңіз, – дейді ақ халатты абзал жан Райса Анасқызы.

Бас медбике Райсаның айтқан сөзінің жаны бар. Шын мәнінде, мықты медбикені дайындау бөлім­шенің аға медбикесіне байланысты. Осы күнге дейін бір ғана жан сақтау бөлімшесінде Райса Анас­қызы 50 шақты медбикенің тәжі­рибесін толықтырды, білікті медби­ке етіп шығарды. Қазіргі таңда жан сақтау бөлімшесіндегі медбикелер Г.Рахметова, Т.Абдуллаева, А.Ниязмағамбетова аға медбикенің ізін жалғастырып келе жатқан, өз ісінің мықты мамандары.

Уақытпен санаспай тәулік бойы науқастың жанында қалатын аға медбикенің қызметі адалдық пен жа­уап­­кершіліктен жаратылғанына ерік­сіз бас иесің, құрметтейсің.

Қазір тәжірибелі аға медбике ау­дандық емханаға бас медбикелік қызметке ауысты. Оның ұзақ жылғы қызметін лайықты бағалаған аурухана басшысы Н.Мырзағалиева осы жауапты қызметті сеніп тапсырды. Ол үшін Райса Анасқызының бас дәрігерге, сенім білдіргеніне айтар алғысы мол. Бас медбикелік қызметке келгеннен кейін аурухана басшылығы ұсынысы негі­зінде Финляндияның Хельсинки қа­ласында біліктілігін арттырды. «Мейірбике ісін ұйымдастыру – Финляндия тәжірибесі» тақырыбында өткен курста аймақтан жасақталған 16 бас медбикелердің қатарында ше­тел тәжірибесін меңгерді.

Бас медбикенің қарамағында 400-ге жуық медбикелер мен 100-ден астам кіші буын медицина қыз­меткері бар. Әрбір қызметкермен жеке жұмыс жүргізіп, бағыт-бағдар беру – оның басты міндеті. Сондай-ақ медбикелердің білім деңгейін көтеру үшін оқу курстарына жіберіп отыру да оның қызметінің бір саласы. Мұнан басқа құжаттармен айналысып, дәрігерлермен жұмыс жасау, өзі жетекшілік ететін медбикелер мен тазалықшылардың мін­деттерін реттеп, жұмыс кестесі мен тәртібін қадағалауды қалт жібермеу – күнделікті жұмысы. Сонымен қатар білікті медбике өзі қызмет еткен аурухананың жан сақтау бө­лімшесіндегі әріптестерімен тығыз байланыс орнатып, науқастарды кү­тіп-баптауды үйретуге де уақыт табады. Қолы қалт етсе, бөлімшенің медбикелеріне білгенін үйретіп, тәжі­рибесімен бөлісу, кәсіби деңге­йін көтеруден шаршаған емес.

Жоғары санатты бас медбике туралы әріптесі Нұргүл Мұхамед­жанова жылы лебіз білдірді.

– Райсамен қатар мектеп бітір­дік. Медициналық колледжде бір­ге оқыдық, қызметке де бірге келдік. Оның мамандығына деген сүйіспеншілігі, адалдығы кісі қызы­ғарлықтай. Қызметіне жауап­кершілікпен қарайды. Қазір қай салада болмасын талап күшейтілді. Әсіресе, әлемді дендеген індеттің тез таралуы медицина қызметкерлерін ширата түсті. Бас медбике алдыңғы шепте жүріп, науқастардың тез са­уығып кетуіне атсалысып келеді, – деді Н.Мұхамеджанова.

Өзінен кейінгі жас мамандарға білгенін үйретіп, кәсіби біліктілігін арттырып келе жатқан өз ісінің майталманы Райса Анасқызы – отбасында сүйікті жар, аяулы ана. Жұбайы Еркінмен бірге 2 қызды өсіріп, тәрбиелеп келеді. Үлкені Аяжан – қаржыгер, кішкентайы Айлина – мектеп оқушысы.

Бақытын отбасынан, сүйікті ма­мандығынан тапқан бас медбике Райса Анасқызына төл мереке құтты болсын демекпіз.