Журналист болу – арманым

Армансыз адам қанат­сыз құспен тең. Әр адам­ның жан дүние­сін­де тамыр жайған арманы бар. Сол арманыммен, жеткен жетістіктеріммен жас дос­тарыммен бөліскім ­келіп отыр.

Арман адаммен бірге өседі, өркендейді. Дәл солай, менің де балалық шағымның үлкен бір арманы бар, ол – журналист болу. Кішкентайымда терезеден тысқа көз тастап, әсем шаһар келбетіне тамсана қарап отырған менің ойыма түрлі сауалдар енген-ді. Қиял тұлпарына мініп алып түйсінгенімді еріксіз ақ қағаз бетіне ақтарыла жаза бастадым. Дархан дала төсін, құс самғаса қанаты талатын кең алқапты өлкеден шабыт аламын. Бұл талантымды қазақ әдебиеті пәнінен беретін мұғалімім байқап, маған бағыт-бағдар берді.

Кейін осы бағыт бойынша ізденіп, Шәкәрім шығармалары жайында, дәлірек айтар болсам, Абай бейнесі жайында із­дене бастадым. Саналы ғұмырын халқының теңдігіне арнаған қазақ әде­бие­тінің көрнекті өкілдері мені шығар­ма­ларымен жаулап алды. Осылайша қызығушылық танытып, ұстазыммен ақын шығармашылығын тереңірек зерттеу­ге кірістім. Қай шығармасын алсақ та өскелең ұрпаққа берері мол, керегі зор қазақ ақындарының ой саларлық дүние­лері көп-ақ.

Төл тарихымызды қуаттайтын туындылар маған ерекше әсер қалдырады. Ыждиһатпен зерделеп алып, ұлы ақындардан үлгі алып, мүшәйраларға қатысып, орын ала бастадым. Мектепте де түрлі іс-шараларда өлең оқып, кештерді жүргіздім. «Шаршы топта сөз бастау қиын» дегендей, көпшілік алдында тосылмай сөйлеу менің шабытымды шыңдап, тәжірибемді арттыра бастады. Жыл сайын ғылыми жобаға қатысып жүлделерге ие болдым. Жақында «Мағжан әлемі» республикалық журналының ұйым­­­дастыруымен өткен «Мағжан оқу­лары» конкурсына қатысып, бас жүл­де иелендім. Мектеп қабырғасында сүбелі сөз түйткілін түйіп, ойымның шебер­лігін көрсетіп, мектепшілік дебатта екінші орын, «Зерде» республикалық конкур­сының аудандық кезеңінен үшінші орынды жеңіп алдым. Сондай-ақ «Халықаралық ғылыми тәжірибе» респуб­ликалық олимпиадасынан екінші орын, «Бір өлеңі бір елдің мұрасындай» атты әдеби кеш бай­қауынан үшінші орын, «Өлең – сөздің патшасы, сөз сарасы» атты өлең оқу са­йысынан екінші орын, Шортанбай биге арнау арнап, аудандық кезеңнен үшінші орын иелендім.

Менің жетістігім мұнымен шектеліп қал­масы анық. Өзімді әлі де дамыту үс­тіндемін. Көп оқу арқылы тіл байлығымды арттырып, елі­­міздің жақсы жаңалықтарын халыққа жет­кізіп, халық пен қоғам арасындағы алтын көпір болу – басты ар­маным! Жақсы оқу орынына түсіп, өз ма­мандығыма адал жур­налист болатыныма сенімдімін!

Ақерке СЕРІКБАЕВА,
9 сынып оқушысы