Құрмет төріндегі қос ұстаз

№42 Қ.Баймағанбетов атындағы мектеп-лицейінде жас ұр­пақ­қа талай жыл тәлімді тәрбие мен білім берген ардақты ұстаз­дарды зейнетке шығарып салу дәстүрге айналған. Жақында 40 жылға таяу мектепте еңбек етіп, тер төккен қос ұстаз ағылшын тілі пәнінің мұғалімі Баян Мырзанова мен дене шынықтыру пәнінің мұғалімі Өмірәлі Жакешовке сый-құрмет жасалып, ұстаздардың құрметіне салтанатты кеш өтті.

Баян Қалдыбайқызы Айдарлы ауылын­дағы мек­тепті бітірген соң Қызылорда қаласындағы Н.В.Го­голь атындағы педаго­гикалық институтының ағыл­шын тілі пән мұғалімі мамандығы бойынша оқуға түседі. Алғашқы еңбек жолын жолдамамен Шымкент облысы Бөген ауданы Төрткөл ауылында бас­тайды. Бір жылдан кейін туған ауылында еңбек жолын жалғастырып, 1985-2022 жылдар аралығында №42 Қ.Баймаған­бетов атындағы мектеп-лицей­де жұ­мыс жасады.

Осы жылдар аралығында ұстаз бен шәкірттері біраз жетістіктерге жетті. Оқу­шы­лары пәндік олимпиадалар мен ғылыми жоба байқауларында топ жарды.

Өзі ұстаз ретінде әр жылдары өткен бай­қау­ларда, атап айтсақ, «Қазақстан ұс­таз­дары» қоға­мы ұйымдастырған ағыл­шын тілі пәні бо­йын­ша рес­публикалық қашықтық олимпиадасында І орын алып, «Бейбітшілік әлемі» халықаралық қазақ шы­ғар­­машылық бірлестігі өткізген ғылыми-прак­ти­ка­­­лық конференциясында баяндама жасап, үздік­тер қатарынан көрінді. Мектеп бітірген шәкірт­тері ҰБТ-да жоғары балл алып, грант жеңіп алып отыр­­ды. Осындай еңбектерінің нәтижесінде 2019 жылы Қазақстан Республикасы Білім және ғылым ми­нистрлігінің «Құрмет грамотасымен» марапатталды.

Бүгінде үздіксіз еңбек өтіліне 40 жыл болып зей­нетке зор құрметпен шығып отырған ұстаз – Өмірәлі Жакешов. Ардақты ұстаз шәкірттерін саламатты өмір сүру салтына баулып, спортты сүюге тәрбиеледі. Есімі аудан, облысқа белгілі дене шы­нықтыру пән мұғалімі.

Өмірәлі Тынымұлы Алматы дене шынық­тыру институтын үздік аяқтап, 1983 жылы Н.В.Гоголь атындағы педагогикалық институтта оқытушы болады. 1986 жылдан бүгінгі күнге дейін өзі білім ал­ған Аманкелді ауылындағы №42 Қ.Баймағанбетов атын­дағы мектепте ұзақ жылдар бойына абыройлы еңбек етті.

Атқарған қызмет жылдарында өзі де, шәкірттері де спорттық жарыстарда жеңімпаздар қатарынан көрінді. Еңбегі үшін аудандық білім бөлімінің, об­лыстық білім басқармасының «Құрмет грамотасымен» марапатталды.

Арнайы шақырылған кеш қонақтары, ардагер ұстаздар құрмет иелеріне өздерінің ізгі тілектерін білдірсе, аудан­дық білім бөлімі мен кәсіподағы атынан, мектеп ұжы­мынан шапан жабылып, сый-құрмет көрсетілді.

– Ұстаздың орны қашанда төр. Қырық жыл ұстаздық етіп, бүгінде зейнет демалысына шығып отырған ардақты ұстаздарды зей­нетке шығуымен құттықтаймын. Бала бағ­баны болу қиын да, абыройлы іс. Шәкірт тәрбиелеу жолында абырой биігінен көрініп, өмірлерін ауыл балаларына білім мен тәрбие беруге арнаған ұстаздардың шәкірттері бүгінде еліміздің түкпір-түкпірінде түрлі салада ең­бек етеді. Ардақты ұстаздарға зор денсаулық, қа­жымас қайрат, ұзақ өмір тілейміз, – деді мектеп-лицей директоры З.Жаманқұлов.

Салтанатты кеште Баян Қалдыбайқызы мен Өмір­әлі Тынымұлының шәкірттері де сөз алып, ұс­таз­­дарына жүрекжарды лебіздерін білдірді, сый-сия­паттарын жасады. Кеш иелерінің ағайын-туыс­тары, бауырлары құттықтау сөз арнап, керемет кешті ұйымдастырған мектеп ұжымына алғысын біл­дірді. Қос ұстазға арналған кеш өзіндік сән салтанатымен, ән-биімен, алғысқа, ілтипатқа толы жан тебірентерлік іс-шара ретінде өтті.

Мерейтой иелеріне арналған жиында көпшілік қауым «Әрбір еңбек адамы осындай құрметке ла­йық, Аллам соған жеткізсін» деген тілекпен тебі­ре­не тарқасты.

Бибісара ТАҢАТАРҚЫЗЫ