Көп жылғы бейнеттің мерейлі зейнеті бар
«Қос тойың қабат болсын» дейді қазақ. Аманкелді ауылындағы білімнің қарашаңырағында қос емес, үш бірдей той, үш бірдей қуаныш. №42 Қ.Баймағанбетов атындағы мектеп-лицейі үш бірдей білікті маманды құрметті зейнет демалысына шығарып салды. Бұл – мерейтой әрі мәртебе.Оқу ордасы директорының бастауыш сыныптар жөніндегі орынбасары Роза Смайлова, техникалық қызметкерлер Әтіркүл Дүйсенбекова мен Райхан Мамреевалардың құрметіне мерекелік іс-шара ұйымдастырды. Салтанатты жиынға ауылдық округ әкімі Мейрамбек Нұрғалиев, мектеп-лицей директоры, аудандық мәслихат депутаты Зейнұр Қайраддинұлы және мұғалімдер мен оқушылар қатысты.
Роза Смайлова 1961 жылы Қызылорда облысы, Сырдария ауданы, Тартоғай ауылында дүниеге келген. М.Мәметова атындағы педагогикалық училищеде білім алып, 1982-1985 жылдары №174 мектепте бастауыш сынып мұғалімі болып қызмет атқарған. Кейін Қызылорда педагогикалық институтының (КОПИ) Пимно факультетінде білімін жалғастырады. Жоғары санатты ұстаздың жалпы еңбек өтілі 39 жылды құраса, оның 36 жылы №42 мектепте өткен. Роза апай осы жылдар аралығында өзін жоғары білікті педагог, жаңашыл да талапшыл, өзіндік стилі бар тәжірибелі ұстаз ретінде таныта отырып, өскелең ұрпаққа сапалы білім мен саналы тәрбие бере білді. Еңбегі еленген мұғалім мәртебе төрінен көрініп, талай марапатқа ие болған. Атап айтар болсақ, 2016 жылы Қазақстан Республикасының «Мәртебелі маман» медалімен, 2011 жылы аудандық білім бөлімінің «Құрмет грамотасымен», Қорқыт Ата атындағы Қызылорда университеті ректорының «Алғыс хатымен», 2014 жылы Облыстық білім басқармасының «Құрмет грамотасымен», 2019 жылы Қорқыт ата атындағы ҚМУ ректорының төсбелгісімен, 2019 жылы аудан әкімінің «Алғыс хатымен» марапатталды. Бұл – білікті ұстаз жетістіктерінің бір парасы ғана. Бұдан бөлек, түрлі олимпиадалар мен байқауларда үздік шығып, арнайы жинақтарда баяндама, мақалалары жарық көрген Роза Әбдірейқызы заманына сай білімді шәкірттер тәрбиелеуді өзінің парызы деп біледі.
Ал Әтіркүл Жаппасбайқызы 1961 жылы Аманкелді ауылында көпбалалы отбасында дүниеге келген. Әтіркүл апай алғашқыда «Ауылдық тұтынушылар мекемесінде» жұмыс істеген. 1987 жылы №42 Қ.Баймағанбетов атындағы мектепке жұмысқа қабылданған ол осы күнге дейін білім ордасында абыройлы қызмет етті. 4 қыз, 2 ұл дүниеге әкелген аяулы ана, 23 немеренің ардақты әжесі. Балалары ұстаздық жолды таңдап, жас ұрпақты білім нәрімен сусындатуға өз үлестерін қосуда.
Мамреева Райхан апай 1961 жылы Шиелі ауданы Тартоғай елді мекенінде дүниеге келген. 1980-1981 жылдары Жамбыл облысында есепші мамандығы бойынша білім алып, 1981 жылдан бастап Тартоғай елді мекенінде есепші болып еңбек жолын бастаған. Кейін тұрмыс құрып Аманкелді ауылына табан тіреген. 1985 жылы Тасбөгет кентінде «Ауыл шаруашылығы бөлімінде» есепші болып, 1986-1987 жылдары «АХАЖ» бөлімінде іс жүргізуші болып қызмет атқарған Райхан Әбдімәлікқызы 2007 жылдан бастап №42 мектеп-лицей жұмыс істеп келеді.
Салтанатты іс-шараға қатысып, ұстаздардың қуанышына куә болған ауыл әкімі Мейрамбек Қылышбекұлы:
– Бүгін еңбекті бағалау күні болды. Бұл – ұзақ жылдар бойы бейнет көріп, құрметті зейнет демалысына шыққан ұстаздарымыздың мерейтойы. Білім саласында абыроймен атқарған еңбектеріңізге алғыс білдіреміз. Жас ұрпақты тәрбиелеу жолында келешек ұрпаққа үлгі бола білдіңіздер. Ендігі жерде бейнеттің зейнетін көріп, немере-шөберелердің ортасында ұзақ жасаңыздар, – деп тілектестігін білдірді.
Бұл кеште білім ордасында ұзақ жыл қызмет етіп, бала тәрбиелеу ісінде ерен еңбек сіңірген ұстаздарға құрмет көрсетілді. Қазақы дәстүрге сай, сый-сияпат та табысталды. Оқушылар ұстаздарына арнап ән айтып, өлең оқыды. Білім саласының майталмандары ұйымдастырушылар мен ұжымдастарына ерекше алғыс білдірді.
Аружан МҰХАНБЕТҚАЛИ
