Тіл жанашырлары марапат төрінде

Республика күні қарсаңында аудандағы бірқатар тіл жанашырлары ­марапатталды. «Достық» үйінде өткізілген іс-шараға аудандық мә­дениет және тілдерді дамыту бөлімінің басшысы Ж.Төрәлиев, кент ардагерлер ке­ңесінің төрағасы З.Жүсіпбаев, халықаралық «Қазақ тілі» қоғамдық бірлестігі ау­дандық фи­лиалының төрағасы Ш.Нұрсейітов, ардагер Ә.Байманов және басқа да тіл жанашырлары қатысты.

Жиын барысында алдағы Респуб­лика кү­нінің мәні мен маңызы туралы ой қозғалды. №36 мектеп-лицейдің 7-сынып оқушылары мерекеге орай жаттаған тақпақтарын көп­шілік алдында оқып берді. Одан кейін Е.Сағынбай қазақтың қара домбырасын «сөй­летіп», күмбірлетіп күй төкті. Тыңдарман қа­уым­ның құлақ құрышын қандырған ән-шашу­ды Л.Серікбаева әуелетті.

Одан кейін халықаралық «Қазақ тілі» ҚБ аудандық филиалының төра­ға­сы Шаһарбек Балтабайұлы бүгінгі жиын­ның мәні мен маңы­зына тоқталып өтті.

– Биылдан бастап халықпен қай­та қа­уыш­қан ұлттық мерекенің ел тұр­ғындары үшін мән-маңызы жоғары. Біздің бейбіт елде өмір сүруіміз – азат­тықтың арқасы. Ал сол егемендігіміздің түп негі­зінде осы Республика күні тұрғаны бар­ша­­мызға белгілі. Осындай тұғыр­лы Тә­уел­сіздігіміздің арқасында еліміз­де мем­лекеттік тіліміздің мерейі асқақ­тады. Осы мереке қарса­ңын­да ауданы­мызда ана тіліміздің жан­да­нуы жолында аянбай еңбек етіп жүр­­ген тіл жанашырларын марапаттау мақса­тында бүгін бас қосып отырмыз. «Тілі жоғалған ұлттың – өзі жоғалады» деген. Ана тіліміздің өсуі мен өркендеуі жолында қызмет етіп, «Қазақ тілі» қоғамының жұмысына бел­сене араласып жүрген бар­шаңызға алғы­сымды айтамын, – деді Ш.Нұрсейітов.

Содан соң аудандық мәдениет жә­­не тілдерді дамыту бөлімінің басшысы Ж.Төр­әлиев тіл жанашырлары Ә.Байманов, Л.Серік­баева, Ғ.Үсенбай, А.Төлеуоваларға облыстық «Қазақ тілі» қоғамының төрағасы С.Аңсаттың «Алғыс хаты» мен сый-сияпатын табыс­тады. Марапат төрінен көрінгендер қа­та­рында ау­дандық «Тіршілік тынысы» газетінің бас маманы Нұргүл Сарқыншақова да бар. Ендеше, мереке қарсаңында алғысқа бөленіп, мәр­тебесі артқан тіл жанашырларына біз де құтты болсын айтамыз.

А.МҰХАНБЕТҚАЛИ