Ардагер-ұстаздар құрмет төрінде

№35 И.Тоқтыбаев атындағы мектеп-лицейінде ардагер-ұстаздарға құрмет көрсетілді. «Қалдырған ізің мәңгілік» тақырыбымен өткен іс-шарада саналы ғұмырын шәкірттерге арнаған ардақты ұстаз Ұлболсын Қалхоразованы зейнет демалысына шығарып салу рәсімі өтті. Ардагер-ұстаздардың жолын қуып, аман-есен мерейлі сәтке жеткен аяулы ұстаз әріптестерінің ыстық ықыласына бөленді.  

Ұлбосын Қайқыбекқызы оқушыларға берген білімі мен тынымсыз еңбегінің нәтижесінде көптеген марапаттарға ие болды. Атап айтсақ, 2015 жылы Білім және ғылым министрінің алғысын, аудан әкімінің және аудандық білім бөлімінің «Алғыс хатын»алды. 2018 жылы Сырдария ауданының әлеуметтік-экономикалық дамуына үлес қосқаны үшін «Ауданның 90 жылдық» мерекелік медалімен марапатталды. 2019 жылы «Нұр Отан» партиясы Сырдария аудандық филиалының «Алғыс хатын» алды және Қызылорда облыстық Білім басқармасы Білім және ғылым қызметкерлері кәсіподағының «Құрмет грамотасына» ие болды. 2020 жылы ҚР Білім және ғылым министрлігі «NOBEL EDUCATION» халықаралық педагогикалық орталығының Құрмет грамотасымен және «Қазақстан ұстаздары» қоғамының «Қазақстанның үздік ұстазы» төсбелгісімен марапатталған. Сонымен қатар Қазақстан Республикасы Тәуелсіздігінің 30 жылдық мерекесі қарсаңында «Ерен еңбегі үшін» медалінің иесі атанған.

Ұстаздық тәжірибесінде мыңдаған шәкірттерді білім баспалдағымен шыңға өрлеткен парасатты ұстазға мектеп-лицей директоры Б.Бақбергенова, ардагер-ұстаздар ізгі тілектерін жеткізді.

Мерекелік кеште мектеп-лицейде еңбек еткен бүгінде ардагер-ұстаз атанған, 70 жастың төріне шыққалы тұрған Роза Әбдуова, Съезкүл Оразаева, Сәрсен Құдайбергенова, Құралай Досмағамбетоваға құрмет көрсетілді. Қадірменді ұстаздарды аудандық ардагерлер кеңесінің төрағасы М.Келдібаев, кент ардагерлері кеңесінің төрағасы З.Жүсіпбайұлы құттықтады.

Аудандық білім қызметкерлерінің кәсіподақ ұйымының төрағасы А.Есназаров ұлағатты ұстаздарды құттықтап, сый сияпат жасады.

Айту керек, мерекелік іс-шараны мектеп-лицейдің бастауыш ардагерлер ұйымының төрайымы Ұ.Бекмағанбетова ұйымдастырды. Жалпы білім ордасында 28 ардагер-ұстаз бар.

Бибісара ЖАНӘЛІ