Мәртебелі мамандықтың қадірін арттырған

«Садақаның ең жақсысы – ілім үйреніп, оны басқаларға үй­ре­ту» дейді Имам Тирмизи. Демек, шәкірт тәрбиелеп, оларды білім нәрімен сусындататын ұстаздардың еңбегі қай кезде де зор құрметке лайық. Ұстаздық етуден жалықпай, өзгенің уақытын аялайтын ұлағаты мол білім қызметкерлерінің шәкірттері де көп болып, биік шыңдарды бағындыратыны анық. Міне, сондай көп шәкіртті тәрбиелеп, ұзақ жыл мектеп қабырғасында сапалы білім бере білген ардагер-ұстаз Әзімхан Жүнісов – бүгінде құр­мет төріндегі қадірлі жан.

Жақсы жолға түскен арбаның алдыңғы дөң­гелегінің кейінгіге әсері де жақсы болары хақ. Жетікөлдік ардагер-ұстаз туралы да жұрт­шылық, білім мен тәрбие алған шәкірттері осын­дай пікірде. Өйткені, саналы ғұмырын ұс­таздық жолға арнаған қадірлі мамандық ие­сі өткен ғасырдың 70-жылдарынан мектеп қа­быр­­ғасында еңбек етіп, оқушыларға білім нә­рін сепкен. Сабақ беру процесіндегі өзіндік ерек­­шеліктері, оқушыларға қамқорлығы, білім­ділігі көпшіліктің көкейінде жоғарыда айтқан жақ­сы пікірді қалыптастырған.

Негізінен, ардагер-ұстаз Ә.Жүнісов – Шиелі ауданының тумасы. Ұлы Отан соғысы жылдарында, яғни 1942 жылдың қысында дүние дидарын ашып, көршілес ауданда орта білім алған. Одан кейін Қызылордадағы Н.В.Гоголь атын­дағы педагогикалық институттың жаратылыс­тану факультетіне жоғары оқу орнына түсіп, білім игереді. Ұстаздық жолды таңдап, хи­мия-биология пәні бойынша жоғары білім ала­ды.

Өткен ғасыр еншісінде жоғары оқу орнын бітірген жас мамандар арнайы жолдамамен еліміздің түкпір-түкпіріне жіберіліп, олардың ең­бек жолының басталуына мүмкіндіктер жа­салған. Сондай жолдама бойынша жас маман Әзімхан Жүнісов Жамбыл облысына барады. Аталған өңірдің Мойынқұм ауданында ұстаздық жолды бастап, мектепте химия пә­нінен сабақ береді. Оқушыларға Менделеев кестесіндегі химиялық элементтерді жаттатып, олардан тұтынатын заттарды жасаудың ал­ғышарттарын түсіндіреді. Ал одан соң әскер қатарына алынып, Отан алдындағы борышын өтейді.

1968 жылдың басынан Ә.Жүнісов өзі оқы­ған сегізжылдық мектепте қызмет етеді. Ол кезеңде Шиелі ауданының Тартоғай ауы­лы Сырдария ауданына қарасты болған. Атал­ған совхоздағы №154 орталау мектепте тәрбиеші, одан соң мектеп директорының оқу ісі жөніндегі орынбасары болып, білім ме­кемесінде оқушылардың сапалы білім алуына жауапты жұмысты атқарады. Еңбек жолында ол көрші аудандағы №153 орта мектебінде мектеп директорының оқу ісі жөніндегі орынбасары және №228 орталау мектебінің директоры қызметтерін зор жауапкершілікпен, абыроймен атқарған. Туған жерге қызмет етіп, оқу­шылардың жаратылыстану бағытындағы та­ны­мының кеңеюіне қажырлы еңбек еткен.

Ұстаздық қызметте абыройға кенелген Әзімхан Жүнісұлына өткен ғасырдың төртінші ширегінде үлкен жауапкершілік жүктеледі. Нақ­тысын айтқанда, 1979 жылы отбасымен бір­ге қазіргі Жетікөл ауылына көшіп келеді. Сол жылы Жетікөл Аманкелді совхозынан өз алды­на елді мекен болып бөлініп шықты. Және де Жетікөл ауылдық кеңесінің председателі бо­лып Ә.Жүнісов тағайындалған.

– Қазіргіше айтқанда ауылда 3 жыл әкім болдым. Ұстаздық қызметтен мемлекеттік қыз­метке кірістім. Ол кезеңде ауылды көгал­дан­­дыру мәселесі өзекті болды. Егілген көшет­тер­дің көктеп кетуі үшін ауылда аяқ су жоқ. Аяқ су келетін су жолдары да болмады. Содан жан-жақты жұмыстар жүргізіліп, қазіргі аяқ су жолдарының ізі қазылды. Елді мекенге аяқ су келіп, мәселе өз шешімін тапты. Ол кезеңдер қиын шақтар еді. Десе де ауыл халқымен бір­ге жұмылып еңбек еттік, – дейді сол бір кезең­дерді еске алған қадірлі қария.

Мемлекеттік қызметтен соң ардақты жан өз саласына қайта барады. Жетікөл ауылындағы №174 орта мектепте 15 жылға жуық директор­дың мектептен және сыныптан тыс жұмысын ұйым­дастыру жөніндегі орынбасары болса, зейнет демалысына шыққанша химия-био­ло­гия пәнінен сабақ берген.

– Ұстаздық қызметтің өз қиыншылығы бар және жауапкершілігі өте жоғары. Себебі, бала болашағының жарқын болуы ұстазға тікелей байланысты. Сондықтан мектеп қабырғасында жүргенде әрбір оқушының шамшырағын жа­ғып, өз пәнім бойынша жақсы жетістіктерге жетулеріне еңбек еттім. Химия саласы – қызық ғылым. Оқушыларға осы ғылым­ның қыр-сырына қанығу үшін түрлі бағыттағы сабақтар ұйым­дастырдым. Бүгінде осы химия-биология бағыты бойынша жетістікке жеткен шәкірттерім жетерлік, – дейді Әзімхан Жүнісұлы.

Бала оқытуды ұстаным еткен ұстаздың ең­­­бегі жоғары марапаттарға лайық болған. Мә­селен, білікті ұстаз еңбек ете жүріп ҚР Білім ми­нистрлігі халыққа білім беру және ғылым қыз­меткерлері кәсіподағының, облыстық, ау­дан­­дық білім бөлімінің «Құрмет грамотасымен» марапатталған. Ардагер-ұстаз «ҚР Білім бе­ру ісінің үздігі» медалімен, сондай-ақ «Еңбек ар­дагері» медалімен де наградталған.

Өңірдің оқу-ағарту ісінде өзіндік қолтаңбасы бар ардагер-ұстаз биыл 80 деген белесті ба­ғын­­дырып отыр. «Алты Алаштың баласы бас қосса, төр – мұғалімдікі» демекші, ұстаз деген қадірлі мамандықтың қандай болу керектігін ісімен, өнегесімен көрсете білген ардагер-ұс­таз әркез құрмет төрінде.

Ердос БЕРКІНБАЕВ