Тіршілік тынысы Tirshilik-tynysy.kz ақпараттық агенттігі
» » Шағандағы жеке балабақша

Шағандағы жеке балабақша

«Балалар жылы» аясында мектепке дейінгі білім беру саласындағы ауқымды жұмыстарды ақпараттандыру тұрақты түрде жүзеге асып келеді. Оның ішінде, аудан көлемінде бүлдіршіндерге білім мен тәрбие беріп келе жатқан балабақша қызметі назардан тыс қалмайды. Бұл жолы бес мыңға жуық халқы бар Шаған ауылындағы «Нұр Ай Сая» жеке балабақшасы туралы кеңінен тарқатып жазбақпыз.

Негізінен, «Нұр Ай Сая» жеке балабақшасы осыдан 6 жыл бұрын пайдалануға берілді. Бүгінде бала­бақшада 2 топта 50 бала тәрбиеле­нуде. Алғашқы жылдары өз қаражаты есебінен жұмысын жандандырған Ұлбала Тұрғанбекқызы отбасылық кә­сіп­ті игерді. Нәтижелі жұмысты ұйымдастырған білікті басшы ұжымға тәжірибелі педагогтарды тарта біл­ді. Қазіргі уақытта 18 қызметкер бі­лім сапасын арттыруға, халық баласын тәрбиелеуге барын салуда. Мем­лекеттік қолдау аясында ба­­ла­­­­­бақ­шаның материалдық базасы кеңейген. Сонымен бірге тәрбие­ші­­­­лердің кәсіби біліктілігін арттыру мақ­сатында инно­вациялық білім беру бойынша арнайы курстарға жіберіліп тұрады.

– Шаған ауылында бірнеше мем­лекеттік және жеке балабақша жұ­мыс жасайды. «Нұр Ай Сая» жеке балабақшасын ашудағы негізгі мақсат – отбасылық бизнесті жандандыру, ауыл балаларына жан-жақты тәрбие беру еді. Әрине, сұраныс бар жерде сапаға көңіл бөлінеді. Балабақша қызметін үйлестіру бір ғана адамның қолынан келмейді. Қашанда педа­го­гикалық құрам мен әрбір тех­никалық қызметкердің алдында зор жауапкершілік тұрады. Сондықтан тұ­тастай ұжымның өлшеусіз еңбегі бағалану керек. 50 баланың күнделікті күтімі, оларды оқыту әдіс-тәсілі, уақы­тылы тамақтандыру, сауықтыру шараларын жүргізу, санитарлық таза­лықтың сақталуы басты назарда болады, – дейді балабақша директоры Жанат Есниязова.

Нарықтық заманда бәсекеге қа­білетті болу маңызды рөл ойнайды. Аудан бойынша балабақшалардың әле­уе­ті сараланып отырады. Бала­мен жұмыс жасау барысында шы­ғар­­­­­машылыққа көңіл бөлу керек. Же­тістікке жеткен әрбір бала үшін ұлағатты ұстаз бен ата-ана марқаяды. Соңғы 6 жылда балабақшаның табыс­ты болуы – озық тәжірибенің ар­қасы. Төрт жыл қатарынан аудан көле­мінде семинар «Нұр Ай Сая» жеке бала­бақшасында ұйымдастырылды. Әр се­ми­­нарда бала қабілетін шыңдауға көңіл бөлінді. Балабақша директоры Жанат Рахатқызы «Кәсіпкерлік саласын дамытуға қосқан елеулі үлесі үшін» атағы бойынша облыс әкімінің марапатына ие болды. Сонымен бірге Айзат Рахатқызы «Үздік балабақша меңгерушісі – 2019» номинациясын иеленді. Екі жыл қатарынан Жамила Алиева мен Бағила Алтаева «Үздік балабақша қызметкері» атанды.

– Білім және өнер бәсекелерінде бүлдіршіндеріміз зор табысқа қол жет­кізуде. Әрбір баланың ерекше дамуы­­­на ұстаздар барын салады. Айта кетейік, біз көпбалалы, тұрмыстық жағдайы төмен отбасыларға көмек ре­тінде балабақша төлемақысын төлеу­ді өз мойнымызға алғанбыз. Сан түрлі мерекеде 50 балаға арналып бағалы сыйлық беріледі. Алдағы уақытта тың жоспарға иек артып, жаңа жобаларды жүзеге асырамыз. «Балалар жылы» аясында жүйелі жұмыстар­­­ды жүргіземіз. Айтулы жыл шеңберінде өткізілетін іс-шараларға, түрлі жоға­ры деңгейдегі бай­қау­ларға қатысуға ниеттіміз, – дейді балабақша директоры Жанат Есниязова.

«Бала тәрбиесі – басты байлығың, кешіксең көретінің қайғы-мұң» деп хә­­кім Абай Құнанбайұлы айтқандай, «Нұр Ай Сая» жеке балабақшасының ұжымы балғындардың бабын тауып, ел болашақтарын тәрбиелеуде елеулі еңбек ете берсін демекпіз.

Балтабай АЯБЕКҰЛЫ


27 тамыз 2022 ж. 495 0