Тіршілік тынысы Tirshilik-tynysy.kz ақпараттық агенттігі
» » Балабақша – білім баспалдағы

Балабақша – білім баспалдағы

«Балалар жылы» аясында «Балабақша – бақыт мекені» айдары бо­йынша ауданға қарасты балабақшалар жайлы оқырманға кеңінен ақпарат ұсы­нып келеміз. Бұл жолы кішкентай бүлдіршіндерді білім нәрімен сусындатып келе жатқан №2 «Балдәурен» балабақшасына арнайы барған едік. Елу жылға жуық тарихы бар білім мекемесі жұмысын бізге білікті басшы Аканай Сапархожақызы таныстырды.

Балабақша ауласында жинақылық пен тиянақтылық ерекше көрініс тапқан. Балалар күндізгі дәрісте тәр­биешіден білім алуда. Барлық сабақ арнайы педа­гогикалық әдіс-тәсілмен жүргізіледі. Бүгінде бала­бақшада 3 топ бойынша 75 бала тәрбиеленуде. Негізінен, балабақшада 23 қызметкер жұмыс істейді. Оның ішінде 10 педагог бар. Алғаш Тәуелсіздік алған жылдары балабақша жұмысы тоқырауға ұшырап, бір­шама уақыт тоқтап қалған. Соған қарамастан қиын­дықтарды еңсерген ұжым жұмысы қайта жанданып, жаңа міндеттер қойылған. Өткен ғасырда Ақжәми Балабаева негізін қалаған балабақшада бірнеше білікті мамандардан өш­пестей із қалдырды.

– Біз келешек ұрпақтың саналы тәрбиеленуіне барынша жағдай жасаймыз. Әр жылдары ұжымды басқарған білікті басшылар халық баласын өз перзенттерінен ар­тық көрді. Мекеме жұмысы тұралап қалған уақытта сол кездегі аудан басшысы Алмагүл Божанованың күшімен қайта ашылды. Міне, содан бері тәжірибелі тәрбиешілер мыңға жуық баланы үлкен өмірге қанат қақтырды. Бе­рекелі ұжымды басқару – мен үшін абырой. 2018 жылы білім ошағын 20 жыл басқарған Күлжамал Жолдасовадан қабылдап алдым. Аз ғана уақыт ішінде іргелі ұжым­мен зор жетістікке қол жеткізіп келеміз. Сала мамандары түрлі республикалық, облыстық, аудандық бай­қауларда топ жарып жүр. Мәселен, әріптесіміздің арасында «Үздік жас маман» төсбелгісімен және «Үз­дік мектепке дейінгі ұйым қызметкері» Qaztest.kz рес­публикалық олимпиадасында жеткен үздік нәтижесі үшін стипендия иегері, «Үздік тәрбиеші» төсбелгісімен, «Шебер тәрбиеші», «Үздік музыка жетекшісі» сынды жоғарғы марапаттарға ие болған сала мамандары бар, – деді Ақанай Сапархожақызы.

Бүгінде балабақшада заманауи әдіс-тәсілдердің кө­мегімен балаларға көптеген сабақтар өткізіледі. Та­қырыптық сабақ негізінде бүлдіршіннің ой-өрісін, сөй­леу қабілетін дамытады. Сонымен бірге тәрбиешілер ойын түрінде сабақтың мазмұнын аша түседі. Бұл ретте баланы жалықтырып алмас үшін педагогикалық, логикалық тапсырма беріледі. Әрбір баланың өзіндік ерекшеліктеріне сай өнерге баулиды. Өнерлі өрендер түрлі деңгейдегі байқауларға қатысып, жеңімпаздар қатарынан көрінуде.

Жақында балабақшада «Тетрландырылған әрекет­тер­ді ұйымдастырудың заманауи әдістері» тақырыбын­да аймақтық семинар өткізілген. Семинар барысында «Қарлығаш» тобының тәрбиешісі Махабад Жапбасбае­­ва «Қысқы баспана», «Ботақан» тобының тәрбиешісі Гүлмира Қуантаева «Қолғап» ертегісі және «Балапан» тобының тәрбиешісі Айжан Қасымова «Бауырсақ» ертегісі арқылы оқу қызметтерін ұйымдастырды. Өз кезегінде балабақша педагог-психологі Шолпан Қуа­нышова «Қарлығаш» тобының тәрбиеленушілерімен бір­ге «Таңғажайып көбелек» тақырыбында ертегі терапия­сына байланысты тренинг жүргізсе, музыка же­текшісі Нұргүл Маханбетжанова жетекшілігімен «Ор­ман­дағы оқи­ға» атты музыкалық сахналық қойылым болды.

– Балабақша жұмысын жетілдіру мақсатында жан-жақты іс-шаралар ұйымдастырылады. Кішкентай бал­ғын­дарымызға жайлы орта қалыптастыру үшін бір­неше рет ғимаратқа орташа және күрделі жөндеу жүр­гізілді. «Жақсының жақсылығын айт, нұры тасысын» дегендей, тереңөзектік жеке кәсіпкер Дархан Шағыров балабақшаның жөндеу жұмысына 200 мың теңге қар­жылай қолдау көрсетті. Жомарт жанға бүлдіршіндерге қамқорлық жасағаны үшін алғысымызды айтамыз. Ба­лабақша педагогтары мерзімі келген уақытта арнайы оқу курстарынан өтіп тұрады. Әркез ізденіс үстінде болған маманның тәжірибесі толыса түседі. Мектепке баратын бүлдіршіндер білімнің алғашқы элементтерін бізден меңгереді. Сондықтан біздер баланы жан-жақ­ты қызықтыра, таңқалдыра білуіміз керек. Осы жолда сала мамандары еш аянып қалмайды, – дейді балабақша меңгерушісі.

Әрқашан бала бағбаны атанған балабақша ұжымы айтулы жұмыстарды атқарып келеді. Өз тарапымыздан «Балдәурен» ұжымының жұмысына сәттілік тілейміз.





Балтабай АЯБЕКҰЛЫ
17 мамыр 2022 ж. 595 0