Тіршілік тынысы Сырдария аудандық қоғамдық-саяси газет
» » Балақайлардың бақытты мекені

Балақайлардың бақытты мекені

Бүгінде үздіксіз білім бе­ру жас ұр­пақтың білімінің тереңдігімен өл­шенеді. Білім­ді, қабілетті ұрпақ ұлты­мыздың баға жетпес қазы­насы саналады. Осы ретте, жас өскіндердің білімді, тәр­биелі болып қалыптасуы балабақшадан басталады. Ауданда бүлдіршіндерді жастай жақсыға үй­ретіп, мектепке дайындайтын бала­бақшалар жетерлік. Солардың бірі – ауданға қарасты Ақжарма ауы­лын­дағы «Бүлдіршін» бөбек­жай бала­бақ­шасы.

Балабақша 1975 жылы типтік жобада салынған. Қос қабатты ғимарат 140 балаға арналған. Бүгінде мұнда 37 қызметкер жұмыс істейді. Бөбекжайда қа­зіргі таңда 5 топта 120 бала тәрбиеленуде. Ересек топта 50, ортаңғы топта 50 және кіші топта 20 бүлдіршін бастапқы білімді меңгеруде.

– Балабақша жан-жағын енді ғана танып келе жатқан балғындардың білім ұясы саналады. Мұнда берілген тәрбие – барлық тәрбиенің бастамасы әрі бұл мекен жан-жақты тәрбиемен дамыту ісінің түпкі негізін қалайтын орын. «Бүлдіршін» бө­бек­жай балабақшасында балалардың бір-бірімен ара­ласып-құраласып, ой-өрістері мен қарым-қабі­летін арттыруға баса ден қойылған. Олардың ба­ла­бақ­шадан үйренері көп. Себебі дәл осы жас аралы­ғын­дағылардың оқуға қабілеті жоғары. Оның үстіне бізде біліктілігі жоғары педагогтарымыз көп. Ұжым ретінде «Баланың өскен бесігі – кең дүниенің есігі» қағидасымен келешекке қадам басудамыз, – дейді балабақша меңгерушісі Рабиға Баекеева.

Меңгерушінің айтуынша, балабақшада жұмыс іс­тейтін 37 қызметкердің 16-сы – педагог, 21-і – кіші қыз­меткер. Педагогтардың сандық сапалы құрамы бойынша жоғары білімдісі – 8, арнаулы орта білімді – 8. Сондай-ақ 5 модератор, 2 педагогтің ІІ санатты білік­тілігі бар.

Тіректі елді мекендегі балабақшада оқыту жү­йе­сі «Мектепке дейінгі тəрбие мен оқытудың мем­лекеттік жалпыға міндетті стандарты» үлгілік оқу жоспары мен үлгілік оқу бағдарламасына негіз­делген. Мұнда балалардың табысты бейімделуі мен дамуы үшін барлық жағдай жасалған. Мектеп жа­сына дейінгі балалар мәдени және гигиеналық дағдыларға, күн тәртібін, ұйымдастырылған оқу қыз­метін сақтауға, өзін-өзі үйрету дағдыларын қа­лыптастырып және оларды күнделікті өмірде қол­дануға бейімделген. Сондай-ақ әр баланың жеке ерекшеліктерін ескере отырып, педагогтар оларды жан-жақты дамытуға арнайы білім беру салаларын кіріктіру негізінде жұмыс істеуде.

– Балабақшада 2021 жылы логопедиялық кабинет жасақталып, пайдалануға берілді. Мұның енді ғана сөйлеуге дағдыланып келе жатқан бүл­діршіндерге септігі зор. Одан бөлек, жұмыс барысында балабақша қызметкерлерінің біліктілігін, кә­сібилігін дамыту үшін түрлі сайыстар, тренингтер, дөңгелек үстелдер өткізіліп тұрады. Атап айтқанда, ауылдық мәдениет үйінде «Наурыз» мере­кесіне орай өткізілген мекемеаралық жарыста жүлделі екінші орынды иелендік. Балабақшалар арасында ұйымдастырылатын аудандық, облыстық семинар, байқауларға да жиі қатысамыз. Сондай іс-шаралардан жинақтаған тәжірибе ар­қылы бал­ғындарымыз білімді, тәрбиелі болып қалып­тасуда, – дейді Рабиға Сайлаубайқызы.

Білікті педагогтар тәрбиесін көрген балабақша тәрбиеленушілері республикалық, облыстық, ау­­дан­­­дық байқауларда белсенділік танытуда. Әр­­бір қы­лықтары баршаны сүйсіндіретін бүл­діршін­дер түрлі сайыстарда топ жарып, мерейді үстем етіп жүр. Мәсе­лен, Ал­маты қаласында өткізілген «Бала дарын» рес­публикалық жасөспірімдер байқауында бала­бақша тәрбиеленушісі Нартай Ақтілек Абай Құнанбайұлы­ның «Күз» өлеңін мәнерлеп оқып, І дәре­желі дипломмен марапатталған. Бұл бөбекжай ұжымы үшін де, ата-ана үшін де зор қуаныш, жетістік.

– Менің немерем Нұрдана осы жерде мектепке дейінгі тәрбие алуда. Ол балабақшада жасына сай базалық білім алып, зейінін қалыптастыруда. Тек бұл ғана емес, саламатты өмір салтына бейімделіп, өнерге де қадам басты. Немерем осында келгелі белсенді. Түрлі тақпақ жаттап, ән айтуда. Апайлары да мейірімді, бізбен де жақсы қарым-қатынаста. Жалпы ұжымның жұмысы көңілімізден шығады, ал­ғыс айтамыз – дейді ақжармалық ардақты ана Марина Тасбергенова.

Білімге деген алғашқы баспалдақты қалыптас­тыруда «Бүлдіршін» бөбекжай балабақшасының қызметкерлері қажырлы еңбек етіп келеді. Тиі­сінше, «Бүлдіршіндегі» балғын шақ балабақша тәр­биеленушілері үшін қызықты өтіп жатқанына се­німдіміз. Саналы ұрпақ тәрбиелеудегі ұжым қыз­метіне зор табыс тілейміз.


Ердос СӘРСЕНБЕКҰЛЫ

02 тамыз 2022 ж. 186 0
  • Акимата Кызылординской области
  • Сайт президента
  • Нұрлы жол
  • Рухани Жаңғыру
  • Жаңғыру 30
  • Egov
  • Digital Kazakhstan
  • Нақты қадам