Адал еңбегімен абыройға кенелген
Өзі өмірден өтсе де өнегелі ісі мен сүбелі сөзі ұмытылмайтын тұлғалар болады. Тереңөзектік белгілі өнертапқыш Абадулла (Абат) Сейілов сондай ұмытылмайтын тұлғалар санатынан десек қателеспейміз. Ол ауданның ауыл шаруашылығы саласында ұзақ жылдар қажырлы еңбек етті. Мекеме басқарып, ұжымға абыройлы басшы, қоғамға сыйлы азамат болды. Бүгін ардагер ағалардың ұсынысы негізінде қолға қалам алып, еңбексүйгіштігімен ел құрметіне бөленген азамат туралы жазуды жөн көрдік.
Халық даналығында «Әлемнің әміршісі – еңбек» деп бекер айтылмаған. Әр азаматтың абыройға, беделге адал еңбегімен жететінін ұғынған ата-бабаларымыз ұрпағын бала күнінен еңбексүйгіштікке баулыған. Біздің бүгінгі кейіпкеріміз Абадулла (Абат) Сейіловтің де ата-анасы перзентінің адал еңбекті ту етіп, қоғамға пайдасы тиетін маман болғанын қалағаны анық. Ата-ананың ақ үмітімен, ұстаздардың адал еңбегімен ұштасқан осынау игі ниеттің арқасында А.Сейілов алдына үлкен мақсаттар қойды. Ол жоспарларына ізденісті серік етіп, табанды еңбек етумен жететінін білді. Сөйтіп, аудан орталығындағы №36 орыс орта мектебін үздікке тәмамдаған соң арман қуып, сонау Украинаға аттанады. Жолы болғанда Мелитополь қаласының климаты мен Сыр өңірінің ауа райында ұқсастық көп болып, ол үлкен қалаға тез үйренісіп кетеді. Мұнда ауыл шаруашылығын механизациялау институнда оқып, белгілі ғалымдар мен тәжірибелі дәріскерлерден білім алады. Түске дейін оқуда болса, түстен кейін ауыл шаруашылығы саласы бойынша түрлі жұмыстарды атқарып, оқу мен тоқуды қатар алып жүреді. А.Сейіловтің бойындағы бұл қасиетті институттың педагогикалық ұжымы жоғары бағалайтын. Алайда ізденімпаз студент институтта оқып жүргенінде әскер қатарына шақырылып, 1968-1970 жылдары азаматтық міндетін орындауға бел буады. Сөйтіп, оқуды 1971 жылы толық аяқтап, еңбек жолын өзі туып өскен Тереңөзекте бастайды. Осы орайда осыдан бірер жыл бұрын кейіпкеріміздің көзі тірісінде өзімен сөйлесіп, сұхбат құрғанда жалынды жастық шағы мен алғашқы еңбек жолының басталған кезеңдері туралы айтқаны ойға оралады.
«Елуінші жылдардың соңы, алпысыншы жылдардың басында ел тұрмысы әлі түзеліп кете қоймады. Мектептегі оқудан босаған жаз айларында аға-апаларымыздың ертелі-кеш еңбек ететінін көретінбіз. Соған сай біз де еңбек етуге ерте бастан дағдыландық. Ойлап отырсам, бір жағы күнкөріс, бір жағы шыңдалу мектебі болыпты сол кезеңдер. Мен Тәңірден кейін бір құндылыққа тәу ету керек болса, онда еңбек деген қасиетті сөзге бас иетін едім. Өйткені, бізді ер қылған, елді ел қылған құдірет, ол – еңбек» деген еді А.Сейілов.
Иә, еңбекке шыңдалу мектебіндегі сабақтар А.Сейіловке өмірде көп пайдасын тигізді. Ол бұрынғы Тереңөзек ауданының «Қазақ ССР-нің 50 жылдығы» атындағы совхозда басталған алғашқы еңбек жолында еңбексүйгіштігінің арқасында тапсырылған жұмыстарды тиянақты орындап, жақсы қырынан танылды. Совхоздың техника қауіпсіздігі жөніндегі аға инженері қызметін абыроймен атқарды. Кейін МТМ меңгерушісі болып жемісті еңбек етті. Ауыл халқы, совхоз ұжымы жас маманның қарым-қабілеті мен кәсіби біліміне риза болатын. Жұмысқа ерте келіп, кеш қайтуды әдетке айналдырған, әр істің бүгіні мен ертеңін бағамдап барып шешім қабылдайтын маманның алғашқы аяқалысы осылай басталған-ды. Кейін ол аудан орталығынан шақырту алып, аудандық ауыл шаруашылығы басқармасында бас инженер қызметіне тағайындалады. А.Сейіловтің жемісті еңбек жолының ең нәтижелі кезі осы қызметті атқарған уақытында көрініс тауып, оны көпшілік лайықты бағалады. Кейіпкеріміз басқармада еңбек етіп жүріп, біріктірілген агрегат ойлап тапты. Бұрын шаруашылықтарда егін егіліп, ол қамбаға түсемін дегенше бірнеше агрегат пайдаланылған болса, А.Сейілов оның бәрін бір агрегатқа біріктірді. Өнертапқыштың бұл еңбегін совхоздар өз қажетіне жаратып, жұмыс барысында пайдаланды. Білім мен біліктілікті ұштастырған ол мұнымен тоқтап қалған жоқ. Егін жинауда қырмандарға аса қажетті механикаландырылған желі ойлап тауып, оны да қолданысқа енгізді. Сөйтіп, кейіпкерімізді жұрт ауданның маңдайалды инженер-механигі әрі өнертапқыш деп құрметтеді. Осылайша, ол адал еңбегінің арқасында ауданның ауылшаруашылық саласын дамытуға, шаруашылықтар жұмысын механикаландыруға зор үлес қосты. Кейіннен су шаруашылығы мекемесінде директордың орынбасары қызметін де атқарды. Су тасқынынан келетін қауіп-қатердің алдын алу бағытында жергілікті атқарушы билік өкілдерімен бірге аянбай еңбек етті.
Еліміз Тәуелсіздік алғаннан кейін жер-жерде коперативтер құрыла бастады. Бұл жаңашылдық біздің ауданда да жүзеге асып, 1992 жылы ауданда 4 кооператив құрылып, ет-сүт бағытындағы кооперативке А.Сейілов төрағалық етті. Бұл қызметте де ол май зауытын механикаландырып, үнемделген қаржыдан жұмысшылардың айлығын арттырып, Украина, Белоруссия елдерінен ауданға асыл тұқымды малдар әкелді. Білікті азаматтың басшылығымен ауданда жасанды сүт шығарыла бастады. Осы кездерде ауданда ең алғашқы «Шырақ» кіші кәсіпорын бірлестігі құрылып, А.Сейілов директоры болып тағайындалды. Мекеме совхоздар мен фермаларды механикаландыру, жөндеу жұмыстарымен айналысты. Ал 1995 жылдан бастап кейіпкеріміз «Автодор» мекемесінің директоры қызметін атқарды. Бұл туралы қоғам қайраткері А.Божанова өткен күндерді ой елегінен өткізіп, пікір білдіреді.
«Абат Сейілов бұрынғы Тереңөзек ауданының белді азаматтарының бірі еді. Өзінің мамандығына сай жауапты жұмыстарды атқарды, өзіне жүктелген міндетті асқан ыждағаттылықпен орындайтын еді. Бір адамға зияны тимеген, «ешкімнің тауығының аяғы сынбаса екен» дейтін ақкөңіл, ақеден жігіт болатын. Батпандап кірген ауыр науқас ертерек төсекке таңды, сонда да өмірге деген құштарлығын, отбасына, туған-туыстарына, құда-жекжаттарына, дос-жарандарына деген кең пейілін, ыстық ықыласын бір сәт төмендетпей өмір үшін күресті, емделді. Абат ауыр науқаспен қанша күрессе де дерт ақыры алып тынды. Бірақ Абаттың адамгершілігі, адалдығы оны білетіндердің есінде мәңгілікке қалды. Жағдайын сұрап барғанымызда қайта ол бізді жұбатып, жігерлендіріп дем жіберетін. Абат пен Әлияның отбасымен біз жақсы қарым-қатынаста болдық, балаларын жақсы көрдік, бәрі де тәрбиелі, білімді, орнықты, ата-анасының мақтанышы.
Жұмыс бабында Абатпен ол аудандық автомобиль жолдары мекемесін басқарғанда көп араластық. Ауданды екі бөліп тұрған Сырдария өзеніне салынған қалқымалы көпір осы мекемеге қарайтын. Қыс түсердегі мұз қату кезеңі мен көктемгі сең жүруде қалқымалы көпірді уақытша алып, қайта салу жұмысы қияметтің қияметі еді. Сол ауыр да күрделі, қауіпті жұмысқа Абат жанын аямай кірісетін, күндіз тыныштық, түнде ұйқы көрмей, қашан көпір салынып, жол реттелгенше жұмыс басында жүретін. Осындай бейнетке толы жұмыс жыл сайын қайталанады, небір қиын сәттерді бастан өткіземіз, әлі күнге дейін естен кетпейтін қауіпті оқиғалар көп болды. Абаттың еңбеккештігі, қарапайымдылығы, ауданға жанашырлығы, жақындарына, дос-жарандарына деген тілектестігі ешуақытта ұмытылмайды, оның атқарған ісі, қалдырған ізі өшпейді» дейді Алмагүл Божанова.
Айта кету керек, Абадулла (Абат) Сейіловтің еңбексүйгіштігімен ел құрметіне бөленген азамат болғанын байырғы әріптестері М.Келдібаев, Ә.Телғозиев, А.Құлбаев, Н.Дауылбаевтар зор тебіреніспен әңгімелейді. Ардагерлер білікті инженер-механик әрі өнертапқыш болған азаматтың өзі өмірден өтсе де артында өнегелі істері қалғанын айтады. Ал аудан әкімінің орынбасары, Тереңөзек кентінің әкімі, аудандық ішкі саясат бөлімінің басшысы қызметтерін атқарған Серік Нұртазаев кішіпейіл, қонақжай, ақ көңіл А.Сейіловтің қай іске де жанашырлықпен атсалысып, ағалық ақыл-кеңесін айтатын азамат болғанын жеткізді.
– Біз Абат ағамызды бала күнімізден білеміз. Ол кісінің шыққан тегі Ақжарма ауылы болған соң оқушы кезімізде аудан орталығына пәндік олимпиадалар мен спорттық жарыстарға барғанымызда міндетті түрде Абат ағаның үйіне соғатынбыз. «Ағаның үйі ақ жайлау» демекші, кейде берекелі шаңыраққа қона жатып, өзіміздің үйіміздей еркін жүретінбіз. Кейін өсе келе қызмет бабымен араласып, бірге жұмыс істедік. Әсіресе, кент әкімі болған кезімде Абат ағаның ақыл-кеңесі мен бағыт-бағдарына көп сүйендім. Ол кездер бірнеше жыл қатарынан ауданды су тасқыны әбігерге салған қиын кезең еді. Соркөлдің табанына жиналған ыза су халықтың ыза-ренішін тудырып, шағым көбейіп, сол жұмысты реттеуге барлық мекеме жұмылдырылды. Осы ретте, су шаруашылығы саласының білікті маманы Абат ағаға қызыл суды «Әйтек» каналына ағызып жіберіп, ыза судан құтылу жолдарын зерттеп, ұсыныс енгізу жөнінде өтініш айтқан едік. Ол кісі бұл мәселенің халық үшін маңыздылығын ескеріп, бірден арнайы техникалар арқылы өлшеу, сызу жұмыстарын жүргізіп, автожолдың төмендеу жерін уақытша бұзып, «Әйтек» каналына ағызуға болатынын айтты. Сөйтіп, бұл іс аудан әкімінің назарына алынып, облыстық мекемелердің келісімімен ыза судан құтылдық. Кейін жолдың бұзылған жерін қайтадан реттеп, жөндедік. Халық ыза судан құтылғанымызға риза болып, алғысын айтты. Ал біз Абат ағаға қолдау білдіргені үшін рақметімізді жеткіздік. Міне, осындай істердің басы-қасынан табылатын Абат ағамыз қоғамға қажетті істерде уақытпен санаспай еңбек ететін. Ал отбасының шамшырағы Әлия Төлеуова да басшылық қызметтерді атқарған, қызмет пен отбасыны қатар алып жүрген ардақты жан. Ол кісі ауданның әлеуметтік-экономикалық дамуына зор үлес қосты. Қазір ұзақ жылғы еңбегінің зейнетін көруде, – дейді Серік Нұртазаев.
Осы ретте, А.Сейіловтің «Сырдария ауданының Құрметті азаматы» Әлия Төлеуовамен бірге ұл-қыз өсіріп, ұлағатты ұрпақ өрбіткенін айта кеткеніміз жөн. Өнегелі өмір иесінің тағылымды тағдыр жолы туралы бірер жыл бұрын ардагер-журналист Шаһарбек Нұрсейітов қалам тербеген болатын. Сол мақаладан үзінді келтірер болсақ, Әлия Төлеуованың да текті әулеттен шыққан абыройлы жан екенін аңғарамыз.
«Ә.Нұрадинқызы қыстақ орталығындағы №36 орта мектептің 8 сыныбын бітіргеннен кейін Қызылорда медициналық училищесінің фельдшерлік факультетіне оқуға түсті. Арнаулы оқу орнын тәмамдаған соң аудан орталығында екі-үш жыл фельдшер болып жұмыс істеді. Орта буын қызметкер жоғары білімді маман болсам деп армандап, Жамбыл жеңіл және тамақ өнеркәсібі технологиялық институтының инженер-технолог мамандығына оқуға түсті. Диплом алғаннан кейін туған жерге оралып, аудандық тамақтандыру мекемесінде алғашында технолог, кейін директор болып қызмет атқарды. Осы мекемеде 13 жыл абыройлы жұмыс жасады. Одақ тұсында сауда саласында қызмет атқару асқан жауапкершілікті талап ететін. Басшы ретінде әрдайым әділеттілік ұстанымына сай жұмысты таза жүргізіп, сауда жоспарын орындауды жүзеге асырды. Соның нәтижесінде, өткен ғасырдың тоқсаныншы жылдарының бас кезінде Ә.Төлеуова Тереңөзек жұмысшылар кооперациясының төрайымы болып тағайындалды. Бұл қоғамдық формация өзгеріп, нарықтық қатынастар енгізіліп жатқан аласапыран кезең еді. Сауда саласында заман ағымына сай басшылық жасап, жарқын істерімен көрінген Әлия Нұрадинқызы 1995 жылы аудандық мәслихатқа депутат болып сайланды. «Адамды орта өсіреді» дейді халық даналығы. Сол айтқандай, егемендігіміздің бастауында сайлаушылармен тығыз қарым-қатынас орнатып, олардың аманатын орындауда белсенділік танытқан халық қалаулысы аудандық мәслихатқа бас маман болып жұмысқа қабылданды. Одан кейін тексеру комиссиясының төрайымы болып сайланды. Аудандық мәслихат депутаты Әлия Нұрадинқызы 1998 жылы Астана қаласында өткен әйелдердің ІІ республикалық форумына қатысып, Елбасының қабылдауында болды. Мұндай құрмет таңдаулыларға ғана көрсетілетіні белгілі. Осындай белсенді жанға аудан жұртшылығы сенім білдіріп, үш мәрте І, ІІ, ІІІ шақырылымдағы аудандық мәслихаттың депутаты етіп сайлады. Көпшілікпен жұмыс жасаудан мол тәжірибе жинақтаған іскер басшы зейнеткерлікке шығар қарсаңында екі жыл аудандық жұмыспен қамту және әлеуметтік бөлім басшысының орынбасары болып қызмет атқарды. Ол 2009 жылы «Лучшие люди Казахстана, России, Белоруссии, Украины» кітабына енді. Өмірлік белсенділігімен ерекшеленетін Әлия Төлеуова еңбегіне лайық марапаттарға да ие болды. Ол «ҚР Конституциясының 10 жылдығы», мәслихаттың – 10, 20 жылдығы, «Сырдария ауданының 90 жылдығы» мерекелік медальдарының иегері» деп жазған еді Қазақстан Журналистер одағының мүшесі Ш.Нұрсейітов.
Ынтымағы жарасқан ерлі-зайыптылар үш қыз, бір ұл тәрбиелеп өсірді. Үлкен қызы Нұргүл – Алматыдағы жоғары оқу орнында декан қызметін атқарады, техника ғылымдарының кандидаты. Қарашаңырақтың иесі Нұрлыбек – аудандық сумен қамту мекемесінде инженер-технолог болса, Айымкүл – С.Асфендияров атындағы медициналық академияны қызыл дипломмен бітіріп, «Болашақ» бағдарламасы бойынша Америка Құрама Штатында тәжірибеден өтті. Қазіргі таңда Назарбаев университетінде студенттерге дәріс береді. Ал кенжесі Әйгерім Талдықорған қаласында тіс дәрігері болып еңбек етеді.
Осындай өнегелі ісімен өшпес із қалдырған, ұрпақтары өмірден өз орнын тапқан А.Сейілов 74 жасқа келер шағында дүниеден өтті. Жүйрік уақытқа тоқтам бар ма? Асыл азаматтың бақилық сапарға аттанғанына да жыл толыпты. Біз осыған орай ардагерлердің ұсынысы негізінде қолға қалам алып, жоғарыда атап өткеніміздей мақала жазуды жөн көрдік. Ұмытылмайтын ұлы тұлғаның жатқан жері жайлы, топырағы торқа болғай!
Ақтөре ИБРАГИМҰЛЫ