Үйді жөндеуге ұйытқы болды

Бүгінгі нарықтық кезеңде үй салу, үй жөндеу көп қаражатты талап етеді. Мұндайға тұрмысы төмен, мүмкіндігі шектеулі отбасылардың жағдайы келе бермейтіні анық. Тиісінше, жыл өткен сайын баспананың да тұрқы қашып, қаупі жоғарылайды. Тереңөзек кенті тұрғыны Ә.Садықова осындай баспана жайын айтып, жөндеу жүргізуге мұршасы келмейтінін жеткізген. Оған ауданның Атымтай жомарты Расул Есенов көмек көрсетіп, демеушілік жасауды өз міндетіне алған.

Тұрғын үйдің сыртқы тұрпаты кеткен. Сылағы түскен. Оған қоса кіреберіс дәліз бөлмелері құлау қаупінде болған. Оны жөндетуге отбасының жағдайы келмейді екен. Жанұяда мүмкіндігі шек­теулі жандар тұрады. Міне, осыны бағамдаған меценат Р.Есенов үйдің сыртын сылатып, қыштан кіреберіс дәліз бөлмелерін салуға ұйытқы болуда, қайырлы іс жасауда. Оған қажетті құ­рылыс материалдарын алып беріп, жөндеу жұмыстарын да өз есебінен жүргізіп беруде.

– Біздің тапқан табысымыз ел-халық­тың, аудан жұртшылығының тілеуінің нәтижесінде артады. Сондықтан тұр­ғын­дарға әркез қолымыздан келгенше қолдау, демеу көрсетіп келеміз. Хал­қы­мыз «Біреу – біреуге сүйеу» демей ме?! Бір-бірімізге, сүйеу, тіреу болу арқылы өсеміз, өркендейміз. Кент тұрғыны жағ­дайын жақсы білемін. Арбаға таңылған баласы бар. Отағасы да мүм­кіндігі шек­теулі жан. Осы жағын ескеріп, отбасы мүшелерінің үйге емін-еркін кіріп шығу жағын қарастырып, кіреберіс дәлізді оңтайландырып салып беріп жатырмыз, – дейді белгілі кәсіпкер.

Бүгінде тұрғын үйдің жөндеу жұ­мыс­тары аяқталуға жақын. Баспана бұ­рын­ғысынан әлдеқайда жақсарып, жаңа­рып қалды. Осындай игілікті іске мұрындық болған ардақты азаматқа отбасы мү­шелері шынайы ризашылығын жет­кізу­де. Кәсібіне береке тілеп, жұмысына сәт­тілік тіледі.

Ердос СӘРСЕНБЕКҰЛЫ