Төл газетке түгел жазылған

Ел денсаулығын ны­ғай­ту, халыққа сапалы меди­циналық қызмет көр­сету мақ­сатында ең­бек етіп, жұртшылықтың ал­ғысын ар­қалап жүрген сыр­да­рия­лық ақ халатты абзал жандардың аудан­дық газет­­тің тұрақты оқыр­­ма­ны­на айнал­ғанына 80 жылдан асты.

Яғни денсаулық сақтау саласының мамандары газеттің тарихымен біте қайнасып, қазақ баспасөзінің жанашыры ретінде жер­гілікті басылымға қолдау көрсетіп келеді. Ауданның бас дәрігері Жалғасбек Үсенов басқаратын іргелі ұжым биыл да төл газетке түгел жазылып, қалыптасқан үрдісті лайықты жалғастыра білді.

Газетті оқырмансыз елестету мүмкін емес. Оның ішінде тұрақты оқырмандардың орны ерекше. Ауданның денсаулық сақтау саласында жергілікті газеттің 400-ден астам оқырманының болуы біз үшін зор қуаныш. Біз алдағы уақытта денсаулық сақтау саласы мамандарының қажырлы еңбегін насихаттап, ақпараттандыру мақсатында бір­ге еңбек ететін боламыз. Сондай-ақ төл газеттің тұрақты оқырмандарының саны артады деп сенеміз.

– Басылым – қоғамның айнасы, даму көрсеткішінің таразысы. Аудан жаңа­лық­тарын оқып, біліп, танысып отыру әр адам үшін маңызды. Жыл сайын міндетті түрде аудандық газетке жазыламыз. Сала мамандары аудан жаңалықтарының жаршысы бола білген басылымның тұрақты оқырманына айналды. Ауданның дамуында денсаулық сақтау саласының алатын орны ерекше екені белгілі. Сондықтан ауданның әлеуметтік-экономикалық дамуында антына адал дәрігерлердің еңбегі орасан зор және біз оны әркез бағалай білуіміз қажет. Денсаулық сақтау саласында атқарылып жатқан жүйелі жұмыстар мен саланың жетістігі аудандық газетте тұрақты түрде ақпараттандырылып келеді. Осы жұмысты жандандыру қажет деп есептеймін, – дейді ауданның бас дәрігері Жалғасбек Тұрлыбекұлы.

Сала қызметкерлерімен қатар еңбек ардагерлері де газеттің тұрақты оқырманы екенін айта кетуіміз қажет. Редакциямен тығыз әріптестік байланыс орнатқан ден­саулық сақтау саласы ардагерлерінің бірі, алтын қолды дәрігер – Абдолла Арғынбаев.

– Бірнеше ай бұрын «Даму белесіндегі денсаулық сақтау саласы» тақырыбында менің зерттеу мақалам аудандық газетте жа­рияланды. Мақалада тоқсан жылдан астам тарихы бар Сырдария ауданының денсау­лық сақтау саласы көптеген қиыншылық­тарды артқа тастағанынан бастап барлығы кеңінен қамтылды. Расында да аудан құрылған кезеңде денсаулық сақтау сала­сындағы материалдық-техникалық жағдай аса мәз емес еді. Білікті мамандар да тапшы болатын. Бірақ антына адал азаматтар сол қиын кезеңде халыққа сапалы ем-дом жасап, қолдан келген көмегін аяған жоқ. Мемлекеттің қолдауымен, халықтың ықы­лас-пейілімен денсаулық сақтау сала­сының көші жүре түзелді деп айтуға толық негіз бар. Ал Тәуелсіздік алғаннан кейінгі кезеңдегі қолдаулар ерекше болды. Жаңа нысандар салынып, пайдалануға берілді, мамандар біліктілігін жетілдіріп, бұрын тек қала орталығында жасалатын қиын ота­лар ауданда жасалатын болды. Мұның бәрі – Тәуелсіздіктің жемісі, қажырлы ең­бек пен ізденістің нақты нәтижесі. Осы жұ­мыстар аудандық «Тіршілік тынысы» газе­тінде тұрақты түрде жарияланып келеді. Тілшілердің жұмысына шығармашылық сәтті­ліктер тілейміз. Өзіміз әуелі аудандық газетті іздеп, жаңа нөмірінде қандай мақалалар жария­ланғанын асыға күтіп, бәрін оқып шығамыз. Бұл қаламгерлердің еңбегінің оқыр­ман­­дардың ықыласымен ұштасқаны десек болады, – дейді Абдолла Арғынбаев.

Жоғарыда атап өткеніміздей ауданның ден­саулық сақтау саласында аудандық газеттің 400-ден астам оқырманы бар. Бүгін­де оқыр­мандардың мекен жайына аптасына екі рет аудандық басылым жеткізілуде. Редак­цияның баспасөз бөлімінде еңбек ететін таратушылардың айтуынша, газетті сала қыз­меткерлері асыға күтеді. Бұл бірлесе атқарылған жұмыстың жемісі. Осы ретте газетке жазылған барша ақ халатты абзал жандарға және аудандық аурухана ұжымына алғыс айтамыз!

Ақтөре ИБРАГИМҰЛЫ