Елдіктің белгісі
Мемлекеттік рәміздер күніне орай «Қызылорда облысының мемлекеттік архиві» КММ-нің Сырдария аудандық филиалында дөңгелек үстел өтті. «Мемлекеттік рәміздер – Тәуелсіздігіміздің басты құндылықтары» тақырыбындағы жиында мемлекеттік нышандарға құрмет көрсету қажеттілігі насихатталды.Қазақстан Республикасының Мемлекеттік рәміздеріне, елдігіміздің символдарына құрмет көрсету мақсатындағы дөңгелек үстелде аудандық филиал басшысы Р.Турикбаев мерекемен құттықтап, айтулы іс-шараның маңыздылығына тоқталды.
– Мемлекеттік рәміздерді құрметтеу – әрбір азаматтың қастерлі міндеті. Ел тарихына жүгінсек, ата-бабаларымыз туын марқая, мақтана тік ұстап, ұрыс барысында жанын қиса да Туды төмен түсірмеген. Соның нәтижесінде, егемендікке қол жеткіздік. Міне осындай мемлекеттік нышанға деген құрметті үлгі ете отырып, жастарға насихаттау, отансүйгіштік сезімін жоғарылату – баршамыздың борышымыз. Елдігіміздің нышаны саналатын рәміздер – халқымыздың рухын, ұлттық салт-санасын, қаћармандығы мен даналығын, болашаққа үмітін, арман-тілегін жеткізетін ерекше құнды белгілер. Елтаңбамыз ел тарихының тереңінен тамыр тартып, ұлттық рухымызды асқақтатып, шаңырағымыздың беріктігін паш етіп, республикамыздың қанатты тұлпардай ұшқырлығын айғақтап келеді. Биыл Қазақстан Республикасының Мемлекеттік рәміздеріне мерейлі 30 жыл толып отыр, – деді аудандық филиал басшысы.
Жиын барысында Мемлекеттік рәміздерді қолдану тәртібі айтылды. Сондай-ақ «Қазақстан Республикасының мемлекеттік рәміздері туралы» Заңда көрсетілген «Қазақстан» атауын латын графикамен «Qazaqstan» деп стандарттың бүкіл мәтіні бойынша жазу бөлігінде енгізілген өзгерістер де атап өтілді. Дөңгелек үстелге қатысушылар Мемлекеттік рәміздерді құрметтеуге қатысты өз ойларымен бөлісті. Әсіресе, қазіргі жастар арасында жан-жақты түсіндірме жұмыстары жүргізіліп, оларды ұлттық құндылықтарымызға құрмет көрсетуге тәрбиелеу керектігі айтылды.
Ердос БЕРКІНБАЕВ
