Сыңғырла, соңғы қоңырау!

Әне-міне дегенше биылғы оқу жылы да өз мәресіне таяп қалды. Кеше ғана алғашқы қоңырау сыңғыры оқушыларды мектепке, оқу-білімге шақырып, Білім күні мерекесі тойланған еді. Ертең мектептерде соңғы қоңырау соғылып, мектеп бітіруші түлектерді үлкен өмірге шығарып салады.

Ауданымызда барлығы 8261 оқушы болса, биылғы оқу жылында 729 оқушы 9 сыныпты, 422 оқушы 11 сыныпты бітіреді. Аудан бойынша 30 оқушы «Алтын белгіге» үміткер болса, 33 оқушы «Үз­дік аттестатқа» ұсынылуда.

25 мамыр. Ақ бантик тағып, ақ көй­лек киген оқушылар мектепке асығады. Көңілде үміт, са­нада арман, мектепке емес-ау, үлкен өмірге қанат қағады. Мектеп бітірушілер үлкен өмірге жолдама алса, мектеп табалдырығын өткен жылы аттаған балдырғандар бірінші сыныпты тәмәмдап, ата-ана­сының көз қуанышына айналады.

Биылғы соңғы қоңырау салтанаты 25 мамыр күні өтсе, аттестат тапсыру рәсімі маусым айы­ның орта тұсына жоспарлануда. Мектеп бітіру кешін ұйымдастыру барысында оқушылардың қа­уіп­сіздігі баса назарға алынады. Бұл ретте білім басқармасының арнайы бұйрығы шыққанын айта кетейік. Мектеп бітіру кештері мектеп қабыр­ға­сында немесе мектеп ауласында өткізіледі. Үйде, мейрамханалар мен ойын-сауық орындарында сал­танатты іс-шара ұйымдастыруға тыйым салынады. Бұл кәмелет жасқа толмаған балалардың қауіпсіздігі үшін маңызды.

– Соңғы қоңырау салтанатын ұйымдас­тыруда оқушылардың қауіпсіздігі басты назарға алынады. Мектеп қабырғасынан бөтен орындарда кеш ұйымдастыруға қа­таң тыйым салынады. Мұғалімдер мен ата-аналар тиісті орган қыз­мет­керлерімен бірлесе отырып, түлектердің қауіп­сіздігін бас­ты назарға алады. Мектеп бітіру салтанаты жылдағы дәстүр бойынша мектеп ауласында өтеді, – дейді аудандық білім бөлімінің бас маманы Ж.Қойшыбаева.

Бұл – мектеп бітіруші жас түлектердің ғана емес, жылдар бұрын білім ордасын тәмәмдап, мек­­теп қабырғасынан ұзап, үлкен өмірге қанат қаққан түлектердің мерекесі. Он жылдық, жиырма жылдық, отыз жылдық түлектер дәл осы күні қарашаңыраққа жиналып, мәре-сәре болады. Мектепке құрмет көрсетіп, бала күнгі құрбы-құр­даспен кез­де­сіп, өткен күннен сыр шертіседі. Мек­теп қабырғасынан әлдеқашан алыстап кетсе де, бойында жылуы бар әрбір парасатты азамат әріп үйретіп, білім теңізіне жетелеген ұстаздары мен балалық шағының талай қызықты күндеріне куә болған алтын ұя мектебін әрдайым үлкен сағыныш­пен, құрметпен еске алып отырады.

– Биыл біздің мектеп бітіріп, үлкен өмір­ге қа­нат қаққанымызға он жыл толып отыр. Алғашқы онжылдық, сәтін салса, өзіміз білім алған №210 мектепке барып, қара шаңыраққа сәлем береміз. 2012 жылы үлкен өмірге қадам басқан біздер арман қуып еліміздің түкпір-түкпіріне жолдама ал­дық. Бүгінде түрлі мамандықты жан серігі еткен бір кездегі жас түлек жер-жерде Тәуелсіз елдің кемел болашағы үшін қызмет қылуда, – дейді мектеп бітіргеніне он жыл толған Л.Сақтағанова.

– Бүгінгі ұрпаққа қарап шын қуанамыз. Өмір деген кезеңімен алмасып өтеді екен. Біз­дің мектеп бітіргенімізге биыл елу жыл толады. Білім нәрімен сусындатқан Сәрсен апайымызды, тәлім мен тәрбиені қатар үй­рет­кен ағай-апайларымызды бір сәт ұмыт­қан емеспіз. Бүгінде ұстаздарымыздың кө­бі мәңгілік мекеніне аттанып кетті. Бірге өскен құрбының да қатары сиреді... Мектеп бітіріп, жо­ғарғы оқу орнына түсу, білікті маман болып, қызметке араласу – бұның бәрі мәртебе, өмір кезеңдері. Үлкен өмірге қадам басқан ел ертең­дерін маңызды сәт­пен құттықтап, жолдарың ашық болсын деп тілек білдіреміз, – дейді И.Тоқты­баев атын­дағы №35 мектептің 1972 жылғы түлегі Р.Қаратаева.

«Жас түлек» деген көгілдір лента тағып, ақ көйлек киіп, сарбаздай тізілген оқушылар көңі­ліндегі қобалжу сезімі кімді болса да ерекше әсер­ге бөлері сөзсіз. Соңғы қоңырау, соңғы вальс... Ғылым академиясының тұң­ғыш президенті, академик Қаныш Сәтбаев «... 1 қыркүйекте не салтанатты шеру, не салюттер болмайды. Бірақ бұл күн – ешқандай мерекемен тең келмейтін, білімнің асқар шыңына жетелейтін, қайталанбайтын күн. Бұдан асқан ұлы мереке жоқ» деген екен. Оқу жылының абыроймен аяқталып, жыл­дың қорытындылануы да сондай ерекше мейрам.

Айта кетейік, соңғы қоңырау мерекесі аясында мектеп бітіруші түлектердің қайырым­дылық іс­теріне қолдау көрсетіледі. «Мектепке кітап сыйла», ағаш егу бойынша «Мектепке сый» акциясы, әлеуметтік әлсіз отбасы мен балаларға «Шын жүректен – балаларға» акциясы, «Туған жерге тағзым», «Алғашқы ұстазыма алғысымды білді­ре­мін» акцияларын ұйымдастыруға болады.

Оқу жылының қорытындысы бойынша ауданымыз жоғары жетістіктерге жетіп, әр жылды абыроймен аяқтап келеді. Соңғы қоңыраудың салта­наты келесі сыныпқа көш­кен оқушылар үшін жазғы демалысқа ұлас­са, түлектерге сынақ тапсыру, жоғарғы оқу ор­ны­на түсумен жалғасатын болады. Он бір жыл мектеп қабырғасында білім нәрімен су­сындаған жас өрен үлкен өмірге қадам басады. Ендеше, сәт сапар, жас түлек!

Аружан МҰХАНБЕТҚАЛИ