Барлық мәселе бюджет мүмкіндігіне қарай реттеледі
Газетіміздің өткен нөмірінде ақпараттандырғанымыздай, аудан әкімі М.Ергешбаев елді мекендерді аралап, халықпен кездесу өткізуде. Алғашқы тоқсанның қорытындысын жария ету мақсатында ұйымдастырылған кездесу Қалжан ахун, С.Сейфуллин, А.Тоқмағамбетов ауылдары мен Тереңөзек кентінде де өтті.«Сұрақ-жауап» форматында ұйымдастырылған халықпен кездесу жиынына облыстық мәслихат депутаты Р.Есенов, аудандық мәслихат хатшысы Е.Әжікенов, аудандық мәслихат депутаттары С.Әбжәлиев, Б.Есназар, Е.Жақып, А.Ибрагимұлы және ауыл әкімдері қатысты. Аудан басшысы тұрғындарға ең алдымен еліміздегі саяси маңызы бар үлкен өзгерістер жөнінде ақпарат берді. Атап айтқанда, елімізде өткізілгелі жатқан Конституциялық реформаның мәні мен маңызы, Ата Заңның 98 бабының 33 бабына өзгерістер енетіні және ел болашағы үшін әр азаматтың референдумға қатысып, таңдау жасау қажеттігі туралы айтып өтті.
Аудан әкімі сондай-ақ ауданның әлеуметтік-экономикалық дамуының басым бағыттарына тоқталды.
– Жыл басынан бері ауданның өнеркәсіп орындары қолданыстағы бағамен 3240,0 млн теңгенің өнімін өндірді. Оның ішінде өңдеу өнеркәсібі 2959,0 млн теңгені құрап отыр. Қаңтар-сәуір айының қорытындысымен аудан экономикасына 3934,0 млн теңге негізгі капиталға инвестиция тартылды. Бөлшек сауда айналымының нақты көлемі есепті кезеңде 438,5 млн теңгені құрап, өткен жылдың тиісті кезеңімен салыстырғанда 100,3 пайызды құрады. Аудан бойынша 2487 шағын және орта кәсіпкерлік субъектілері тіркеліп, жұмыс істеуде, – деген аудан басшысы ауылдардағы көшелерді жөндеу, аяқ су, электр желілерін жаңарту мәселелері туралы айтып өтті.
Қалжан ахун ауылының тұрғындары ең алдымен аяқ су мәселесін көтерді. Сонымен қатар ауылішілік көшелердің тозғанын айтып, ауылдық дәрігерлік амбулаторияны күрделі жөндеуден өткізу керектігін жеткізді. Аудан басшысы аталған мәселелермен таныс екенін айтып, тиісті сала басшыларына нақты тапсырмалар жүктеді. С.Сейфуллин, А.Тоқмағамбетов ауылындағы халықпен кездесуде де ауыл тұрғындары әлеуметтік мәселелерді аудан әкімінің назарына ұсынды. Әсіресе, бұл ауылдарда шаруашылық үлескерлерінің жер мәселесі талқыланды. Аудан басшысы заңға сәйкес түсіндірме жүргізіліп жатқанын, бұл мәселеде бірінші кезекте елдің бірлігін ойлау керектігін атап өтті.
Ал Тереңөзек кентінде тұрғындар аудан орталығының жаңарғанын, абаттандыру мен инфрақұрылымды жетілдіру бағытында көп жұмыстар атқарылып жатқанын айтып, атқарушы билікке алғыстарын жеткізді. Мұнан бөлек қараусыз жүрген иттер мен ірі қара малдарына тосқауыл қою, тазалықты сақтау, электр сымдарының кей көшелерде төмен орналасқанын зерделеу, көшелерді жөндеу мен балалар ойын алаңын салу, кәсіпкерлікті дамыту және аудан мекемелеріндегі зейнет демалысына шыққан бірінші басшылардың мәселесі көтерілді. Аудан басшысы әр сұрақты мұқият тыңдап, тиісті сала басшыларының қаперіне салып, тұрғындардың сұрағына жан-жақты жауап берді. Сондай-ақ Тереңөзек кентінде атқарылатын жұмыстарды бөлісті.
– Кент көшелерін жөндеу мақсатында биылғы жылғы жоспарға 23 көшеге лайықтандырылған жоба жасалған. Мысалы, Бауыржан Момышұлы көшесінің барлық тұйығымен бірге қосқанда 6 көшесіне бірден асфальт төсеу жұмыстары жүргізіледі. Мұнан бөлек Тереңөзек кентінің ең ұзын әрі орталық көшелерінің бірі Иса Тоқтыбаев көшесіне жаяу жүргіншілер жолын салу және аяқ су жеткізу үшін темір бетонды лоток орнату мақсатында аудандық бюджеттен тиісті қаражат бөлініп, мемлекеттік сатып алу жұмыстары жүргізілуде. Көп қабатты тұрғын үйлердің ауласын абаттандыру – аудан әкімдігінің басты жұмыстарының бірі. Бұл мәселе төңірегінде арнайы талқылаулар ұйымдастырылып, депутаттармен және тұрғындармен бірге жоспарлар жасалған. Дегенмен, қаржы мәселесіне қатысты абаттандыру жұмыстары кезең-кезеңімен атқарылады. Кенттегі А.Әлиакбаров көшесінің бойындағы көпқабатты үйлердің ауласын абаттандыру жұмыстары облыстық бюджеттен қаржыландырылды. Сондай-ақ Тереңөзек кентінің кіреберісіндегі төрт жолдың түйісетін тұсына қауіптілікті азайту мақсатында бағдаршам қою жоспарлануда, – деп қорытындылады аудан әкімі.
А.СЕЙІЛОВ
