Бүгінгі ұрпақ – ел болашағы
Аудандық білім бөлімінің ұйымдастыруымен «Балалар жылы» аясында №36 Ә.Тәжібаев атындағы мектеп-лицейде «Бүгінгі ұрпақ – ел болашағы» тақырыбында өнер фестивалі өтті. Салтанатты іс-шараға ауданға қарасты білім ошақтарынан келген өнерпаз балалар қатысты.Балалар шығармашылығын дамыту мақсатында жүзеге асқан іс-шарада жас өнерпаздар ән айтып, би биледі. Домбырамен күмбірлете күй шертті. Өз кезегінде биші өрендердің «Вальс», «Рок-н-ролл», «Танец с тросточкой», «Қазақ», «Кербез» биі көпшілік көңілінен шықты. Сонымен бірге балғын әншілердің орындауындағы «Туған өлкем», «Сайра, бұлбұлым», «Домбыра туралы баллада», «Тәуелсіз қазақтың қызымын», «Әке-ана», «Туған жер», «Бақытты бала», «Мерекелеріңізбен» әндері тыңдарман жүрегінен жол тапты. Ал «Әке толғауы» күйі ерекше тебіреніс сыйлады.
– «Балалар жылы» аясында ілкімді істер аудан көлемінде жүзеге асуда. Мектеп оқушыларының шығармашылық әлеуетін дамытуда өнер фестивальдерін өткізудің маңызы зор. Үлкен сахнаға шыққан балалар қабілетін барынша шыңдай түседі. Көпшілік көңілінен шыққан кеште жас өрендер зор қошеметке бөленді. Бастауыш сынып оқушылары арасында алдағы уақытта жекелеген жобалар жүзеге асады, – дейді аудандық білім бөлімінің әдіскері Алуа Нұрабаева.
Айта кетейік, өнер фестиваліне белсенді қатысқан балаларға кітаптар табыс етілді.
Балтабай АЯБЕКҰЛЫ
