«Балалар жылына» орай аудан­дағы өнерлі, білімді, жан-жақты балаларды көпшілікке таныстырып, ақпараттандыру мақсатында арнайы айдар ашқанымыз оқырманға таныс. Осы ретте домбыра мен баян­ның құ­ла­ғында ойнайтын, білім мен өнерді, оған қоса спортты қатар алып жүрген Нұралы мен Бейбарыс Баки­шевтердің өнеріне расымен де тәнті болдық. Ағайынды балалардың өнерін бұған дейін де аудандық түрлі іс-ша­раларда тамашалап, риза болып жүрген едік. Халықаралық, рес­публикалық бай­қаулардан жүл­делі орын алып, ау­данның абы­ро­йын асқақтатып жүрген жігіттермен сұхбат құрып, әңгі­мелестік.

«ҚР Білім беру ісінің үздігі», «ҚР Мәдениет саласының үздігі», ау­данның «Құрметті азаматы» атан­­ған Жантемір ағамыздың есімі көп­шілікке таныс. Нұралы мен Бей­барыс – талай жыл өнер мек­тебін басқарып, мәдениет саласына өлшеусіз үлес қосқан арда азаматтың немерелері. «Алма аға­шынан алысқа түспейді» деген, бүгін­де аудан орталығындағы №36 мектеп-лицейде білім алып жүрген жас өрендер өнер десе ішкен астарын жерге қояды. Иә, «Атадан ұл туды, ата жолын қуды» деген осы.

Әңгіме арасында Нұралы мен Бей­барыс домбыра мен баянда түр­лі әуендер ойнап берді. Домбыраның үні естілгенде рухтанып, қос ішектің құдіретіне тағы бір тәнті болдық.

Қос өнерпаздың үлкені Нұралы Бакишев бүгінде 10-сыныпта оқиды. Ауданның қоғамдық өмірінде бел­сенді бозбала мектепте де үлкен беделге ие. Мектеп ішінен құрылған өзін-өзі басқару ұйымдарының «премьер министрі» атанған ол өзінен кейінгілерге ісімен үлгі болып жүр. Ол биыл аудандық әуез мектебінің домбыра және баян сыныптарын тәмәмдайды. Арнайы ор­талықтан өнерлерін шыңдап жүр­ген жасөспірімдердің өнердегі алғашқы ұстазы атасы мен әжесі екенін айта кеткеніміз жөн. Мектеп өмірінде белсенділік танытып бастауыш кәсіподақ ұйымының «Мек­теп көшбасшылары» номинациясымен ма­рапатталған Нұралы биыл қол кү­ресінен жасөспірімдер арасындағы аудандық біріншілікте жүлделі екінші орынға ие болған. Өнер саласынан да биік белестерді бағындырып жүрген жеткіншектің ең үлкен жетістіктерінің бірі – биылғы «Елбасы медалі» жобасының қола медаль иегері атануы. Өнердің сан саласын қатар меңгерген жігіт спорттың да түр-түрін жанына серік еткен. Болашақта елімізге танымал әртіс болуды армандайтын Нұ­ра­лыны әлі талай шыңдардан кө­ретінімізге сенім кәміл.

Бейбарыс та ағасының ізін басып келеді. Расында да, қазіргі заман – оқығандыкі. Өнерлі, білімді адамның қашан да жолы ашық, мүмкіндік те көп. Қазір 9-сынып оқитын Бейбарыс та домбыра мен баянның құлағында ойнайды. Ұлттық аспапты қолына алғанда ерекше ынталанып, делебесі қозып, рухтанып кететін баланың бойына ерекше құтты өнер дарыған. «Balbulaq» балалар мен жасөспірімдер шығар­машылық орталығының «Өнерге қа­нат қаққандар» ІІІ халықаралық байқауында «Аспапта ойнау» номинациясы бойынша бас жүлде иеленген ол республикалық, облыстық, аудандық сайыстарда топ жарып, ерекше талантымен дараланып келеді. Кішкентай кезінен домбыраны жанына серік еткен Бейбарыс болашақта мәдениет саласын да­мытуға өз үлесін қосқысы келеді. Қос өнерпаздың «Асыл мұра» теле­ви­зиялық байқауына қа­ты­суы да үлкен өнерге басқан нық қа­дам­да­рынан екенін айта кет­кеніміз жөн.

– «Жігітке жеті өнер де аз» деген. Сегіз қырлы, бір сырлы болу – жігітке тән. Оның үстіне, өнер қашан да халықтың қазынасы, өшпейтін мұра. Қазіргі кезде күн сайын дамып отыру маңызды. Білімдінің бәсі биік болса, өнерлі адамның өзгелерден бір саты биік тұратыны да ақиқат. «Баланы аясаң, аяма» дейді ғой. Балалардың бір сәт бос отыруға уақыты жоқ. Мектеп пен әуез мектебіне, одан бөлек спорт мектебіне, тағысын тағы. Есесіне, ертеңі жарқын, болашағы жарық азаматтар өсіп келеді, – дейді өнерлі өрендердің атасы Ж.Айсин.

Қос талантты кәсіби түрде дамытып жүрген баян сыныбының жетекшісі Э.Қода­рова мен дом­быраның «құлағында» ойнауға бау­­лып жүрген А.Қилымхановтың еңбегі орасан. Нұралы мен Бейбарыс бүгінде Сырдария әуез мектебінің домбырашылар ансамблінің құра­мында өнер көрсетіп жүр.

Қазақта «құймақұлақ» деген жақсы сөз бар. Бұл кез келген сөзді болсын, әуенді болсын естіген бо­йында құлағына құйып алып, дамытып әкететін ерекше дарын иелеріне бағытталып айтылады. Үлкен өмірге енді ғана қадам басып келе жатқан бір үйдің қос өнерпазы естігенін қалт жібермейді. Өнерлі отбасынан шыққан қос азамат өзі­нен кейінгі іні-қарындастарына да өнеге көрсетіп келеді. Әне-міне дегенше мек­теп бітіріп, үлкен өмірге қадам басқалы отырған Нұралы мен Бейбарыс Бакишевтерге өнерлерің өрге жүзсін, болашақтарың жарқын болсын деп тілек білдіреміз.