Наурыз келді құт алып
Ұлыс деген сөз «ұлы іс» деген сөзбен сабақтас, мағыналас дейді тарихшы ғалымдар. Сондықтан күн мен түн теңелетін, жер бетіне жылылық шуағы тарайтын мерекені халқымыз Ұлыстың Ұлы күні деп ұлықтайды. Осы орайда аудандық білім бөліміне қарасты №2 «Балдәурен» бөбекжай балабақшасында ұлттық мереке жоғары деңгейде аталып өтілді.Ең алдымен көктем мерекесіне орай балабақша ауласы мен ғимарат іші мерекеге сай безендірілді. «Наурыз келді құт алып» апталығының жұмыс жоспарына сай балабақшаның барлық қызметкері ұлттық киім киіп, ата-аналар мен тәрбиеленушілерге қазақы нақышта үлгі-өнеге көрсетті. Іс-шараға балабақшаның барлық тәрбиеленушісі ерекше белсенділікпен қатысты.
Атап айтқанда, «Балапан» кіші тобында ертеңгілік ұйымдастырылды. Ертеңгілікте балалар хормен «Наурыз» әнін орындады. Сондай-ақ өнерлі де өрелі кішкентай қыздар «Қамажай» биін биледі. Ал ер балалар «Тұлпарым» биін сахнаға алып шығып, көрермен көңілінен шықты. Сәні мен салтанаты үйлескен ертеңгілік барысында арқан тарту ойыны да ұйымдастырылды. Тәрбиеші Гүлнар Шағырова көпбалалы отбасыға оқу құралдарынан сый ұйымдастырды. Мұнан бөлек тұсаукесер рәсімі көрсетілді.
Наурыз мейрамына орай мерекелік іс-шара «Ботақан» ортаңғы тобында да өткізілді. Тәрбиешілердің ұйымдастыруымен балалар ұлттық құндылығымызды паш ететін қазақы әндер айтып, би биледі, тақпақтарын жатқа айтты. «Батырлар», «Жұптасу» биін билеген тәрбиеленушілерге қазақ халқының сәбиге есім қою салты туралы мағлұматтар берілді. Мұнан бөлек әдет-ғұрыптар мен салт-дәстүрлер туралы көрініс қойылды.
Ұлттық мереке «Қарлығаш» ересек тобында да ұйымдастырылды. Балалар «Әз-Наурыз», «Наурыз көктем» әндерін шырқап, «Бипыл», «Шәй құю», «Қара жорға» билерін биледі. Сонымен қатар оркестрдің сүйемелдеуімен «Аспаптар» әнін орындап, күш сынасу, қыз қуу секілді ұлттық ойындарды ойнады. Ересек топтың мүшелеріне бесікке салар рәсімі көрсетілді. Іс-шара барысында тәрбиешілер «Ерке сылқым» күйін орындады.
Сондай-ақ Наурыз мейрамына орай №2 «Балдәурен» бөбекжай балабақшасында наурыз көже әзірленді. Ұлттық тағамнан ұжым қызметкерлерімен қатар ата-аналар мен балалар дәм татты. Сонымен қатар аудандық білім бөлімінің бастамасымен бастау алған «Әр жанұядан – бір ағаш» челленджі аясында ата-аналар мен балалар көшет отырғызып, қоғамның жасыл желекке айналуына өз үлестерін қосты. Апталық соңында барлық топ балаларының шығармашылығынан «Ою-өрнектер әлемі» тақырыбында сурет көрмесі ұйымдастырылды.
А.СЕЙІЛОВ
