Бесарықтағы берекелі отбасы
Сырдария ауданындағы Сейітмұратовтар отбасын жұртшылық жақсы біледі. Ел үшін еңбек етіп, бүгінде сол еңбегінің жемісін көріп отырған ерлі-зайыпты Оразбек Сейітмұратов пен Нәзира Жүсіпова абырой биігіндегі құрметті жандар саналады. Олар мемлекеттік қызмет саласында қажырлы жұмыс істеп, аудан экономикасының, оның ішінде Бесарық ауылының өсіп-өркендеуіне ерекше үлес қосты. Сала ардагерлері ретінде олар бүгінгі таңда да ауылдың, ауданның өркендеуіне жанашырлық танытып, қоғамдық істерде де белсенді.Өткен ғасырдың орта шенінде дүние дидарын ашқан Оразбек Ешмағанбетұлының еңбек жолы Бесарық ауылымен тығыз байланысты. Ол 1974-1977 жылдары аралығында «СССР-дың 50 жылдығы» атындағы кеңшардың «Гүлдәурен» комсомол жастар бригадасында мал шарушылығы маманы болып еңбек жолын бастайды. Ол кезеңдерде кеңшарларда ата кәсіп болған мал шаруашылығы саласы кең өріс жайған. Жас маман ретінде О.Сейітмұратов кеңшардағы тіршілікті меңгеріп, тәжірибе жинақтайды. Одан кейін аталған кеңшарда жүргізуші-жабдықтаушы болып еңбек етсе, егемендік алған жылдары өңірдегі құрылыс жабдықтары қоймасында қызмет етеді. Он жылдан аса уақыт Бесарық ауылындағы орталық қоймада меңгерушілік қызметті абыроймен атқарып, елдік жұмыстарда Оразбек Ешмағанбетұлы ептілік танытады. Осындай қызметтерде ұйымдастырушылық қабілетімен танылып, жауапкершілік жүгін арқалай білетін азамат 2007-2013 жылдары аралығында елді мекендегі «Бесарық» ЖШС-нің төрағасы ретінде сайланады.
Мал шаруашылығы, құрылыс саласын меңгерген О.Сейітмұратов шаруашылық төрағасы ретінде кәсіпкерлік бағытты ұстанып, ауыл халқының жұмыспен қамтылуына, тұрмыс деңгейінің жақсаруына қажырлы еңбек ете білді. Ауыл шаруашылығы саласының қыр-сырына қанық болып, шаруашылық жұмысын ілгерілетті. Осы қызметте жүріп елдің мұң-мұқтажын қамтамасыз етуге атсалысты. Осындай іскерлігі, жанашырлығы оны халық қалаулысы етті. Абзал азамат 2012-2016 жылдары аудандық мәслихаттың V және 2016-2021 жылдары аралығында аудандық мәслихаттың VІ шақырылым депутаты ретінде елдік мүдде үшін еңбек етті. Елді мекеннің мұң-мұқтажын атқарушы билікке жеткізіп, ауылда жолдардың салынуына, әлеуметтік нысандардың жаңаруына елеулі үлес қосты.
Іскер, ұйымдастырушылық қабілеті жоғары, білікті азамат 2014 жылдан облыс орталығындағы «Қазқұрылыссервис» мекемесінде инженерлік қызметті атқарып келеді. Бұл қызметпен қатар кәсіпкерлік бағытты дамытуды да назардан тыс қалдырған емес. Мәселен, ауыл халқына қажетті кәсіпті мемлекеттік қолдау арқылы бастап, тұрғынды жұмыспен қамтып, халыққа қызмет көрсетіп келеді. Яғни, «Тәу-Сейіт» ЖШС төрағасы Оразбек Сейітмұратов қайтарымсыз несие арқылы «Кәріз жүйесін тарту» жобасына қаржы ұтып алған. Жоба құны 2 млн теңгені құрайды. Бұл қаражатқа кәсіпкер кәріз тартуға арнайы көлік сатып алған. Оған ауыл тұрғынын жұмысты еткен.
– Алғашында тапсырыс болмағанымен, кейін халық үйренісе бастады. Көпшілігі көлікті қаладан шақыратын. Қазір аптасына 2-3 рет тапсырыс келеді. Сонымен қатар көрші ауылдардан да тұрғындар шақыртып жатады, – дейді О.Сейітмұратов.
Бұдан бөлек, серіктестік төрағасы басқа да кәсіп түрлерімен де айналысады.
Ел азаматы, кәнігі құрылысшы, білікті ұйымдастырушы, кәсіпкер О.Сейітмұратов сан салада қызметте жүріп көптеген жетістіктерге жеткен. Еселі еңбегі оны түрлі марапаттарға лайықты еткен. Атап айтқанда, «ҚР Тәуелсіздігінің 20 жылдығы», «Қазақстан мәслихаттарына 20 жыл», «Қызылорда қаласының 200 жылдығы», «Сырдария ауданының 90 жылдығы» медальдарымен, Елбасы Н.Ә.Назарбаевтың, облыс, аудан әкімдерінің «Құрмет грамотасы» және «Алғыс хатымен» марапатталған. Бұл марапаттар абыройлы азаматтың ел үшін жасап келе жатқан қажырлы еңбегінің жемісі екені сөзсіз.
Оразбек Сейітмұратовтың жары Нәзира Жүсіпова да сан салада еңбек етіп, бүгінде құрмет төріндегі ардақты жан. Оның бала кезгі арманы елге қызмет ету болса, оның ең алғашқы баспалдағы бала бағбаны болудан басталған. Қызылордадағы Н.Гоголь атындағы педагогикалық институтты ағылшын тілі пәні мұғалімі мамандығы бойынша бітіріп, ауылдағы №147 орта мектепте оқушыларға сабақ берген. Біліммен оқушыларға әлемді шарлатып, мектеп қабырғасында құдыретті мамандықтың ізіне түсіп, 25 жылға жуық уақыт ұстаздық етті. Өзінің уақытын аямай, өзгенің уақытын аялай жүріп, оқушыларға саналы тәрбие, сапалы білім беруде тынбай еңбек еткен. Оның алдынан өтіп, шет тілін меңгерген шәкірттері шетте жүрсе де Нәзира Боданқызын ұлағатты ұстаз ретінда құрметтейді.
Өмірін ұрпақ тәрбиелеумен ұштастырған ардақты жан ұстаздықтан соң ауылдағы «Бөбек» балабақшасын 10 жыл басқарды. Әрбір бала әрбір үйдің еркесі болса, оларға тәлімді, тағылымды тәрбие беру үшін балабақша ұжымын ұйымдастырып, әрбір бүлдіршіннің дұрыс қалыптасуына үлкен жауапкершілікпен қарады. Осындай жанашырлығы үшін балабақша меңгерушісі ата-аналардың алғысына бөленді.
Білім саласында мерейі үстем болған Н.Жүсіпова іскер әйел ретінде де танылды. Оның қай істе де жоғары ұйымдастырушылық қабілеті байқалып, соның нәтижесінде ардақты жанға ел-жұрттың үлкен сенімі артылды. Нәзира Боданқызы 2017 жылдың ақпан айынан 2019 жылдың желтоқсанына дейін Бесарық ауылының әкімі ретінде сайланып, ауылды дамытуға өзіндік қолтаңбасын қалдырды. Әрине, әйел затына ауыл әкімі болу оңай емес. Алайда, іскерлік қабілеті мол жан мемлекеттік қызметте мойыған жоқ, керісінше, ауылдағы өзекті мәселелердің шешілуіне мұрындық болып, елмен етене жұмыс жасады. Сол еңбегі үшін құрметке бөленді, абырой тұғырынан көрінді.
Ұлағатты ұстаз, білікті басшы, іскер әйел Нәзира Боданқызы «Қызылорда облысына 70 жыл», «Сырдария ауданының 90 жылдығы» мерекелік медальдарымен, Елбасы Н.Ә.Назарбаевтың «Алғыс хатымен» және облыс, аудан әкімдерінің, білім басқармасының «Алғысымен», «Құрмет грамотасымен» марапатталған.
Елдік мүдде жолында еңбек етсе де Н.Жүсіпова үй шаруасын естен еш уақытта шығарған емес. Қызметте ұстаз, мемлекеттік қызметші болса, отбасында аяулы жар, ардақты ана. Ерлі-зайыптылар ұлы Пазылбекті өсіріп жетілдірді. Бүгінде ұрпағынан Елхан және Айзия есімді немерелерді сүйіп отыр. Бір қызығы, ұлы Пазылбек пен келіні Ләйла да бір салада жұмыс жасайды. Екеуі де банк қызметкерлері.
Бесарықтағы берекелі отбасыны көпшілік үлгі-өнеге санайды. Алғашқы еңбек жолынан елге қызмет етіп келе жатқан жандар абыройлы қызметте болса да, кәсіппен айналысса да айналасындағы адамдарға шарапатын тигізуде. Сол себепті де жұртшылық Оразбек Сейітмұратов пен Нәзира Жүсіпованы ерекше құрметтейді. Өткен жылы олар «Мерейлі отбасы» ұлттық байқауының аудандық кезеңіне қатысып, арнайы дипломмен марапатталды. Мұның өзі Сейітмұратовтар отбасының қандай әулет екенін аңғартады.
Ердос СӘРСЕНБЕКҰЛЫ
